महाशिवरात्रीनिमित्त बेस्टच्या विशेष सेवा

मुंबई : महाशिवरात्रीनिमित्ताने मुंबईच्या काही भागात पर्यटनाला येणाऱ्या प्रवाशांच्या सोयीकरीता बेस्ट उपक्रमाच्यावतीने शुक्रवार, दि. ८ मार्च रोजी काही अतिरिक्त बसगाड्यांची सुविधा प्रदान करण्यात आली आहे. 'कान्हेरी गुंफा' येथील पुरातन लेण्यांना भेट देणाऱ्या प्रवाशांच्या सोयीसाठी बस क्र. १८८ मर्या. या बसमार्गावर संजय गांधी राष्ट्रीय उद्यान ते कान्हेरी गुंफा दरम्यान सकाळी ११ वाजल्यापासून सायंकाळी ७.३० वाजेपर्यंत एकूण सहा जास्तीच्या बसगाडया सोडण्यात येणार आहेत. याशिवाय बोरिवली रेल्वे स्थानक (पूर्व) ते कान्हेरी गुंफा दरम्यान नियमित बससेवादेखील सुरू राहणार आहे. त्याचप्रमाणे प्रवाशांना मार्गदर्शन करण्यासाठी गर्दीच्या ठिकाणी विशेषतः संजय गांधी राष्ट्रीय उद्यान प्रवेशद्वार, एलोरा चौकी (बोरिवली स्थानक-पूर्व) तसेच कान्हेरी गुंफा येथे बसनिरीक्षक आणि वाहतूक अधिकाऱ्यांची नियुक्ती करण्यात येणार आहे.