दोस्त दोस्त ना रहा...

पाकिस्तानी सैन्याने ’तहरीक-ए-तालिबान पाकिस्तान’च्या दहशतवाद्यांना मारण्यासाठी, अफगाणिस्तानच्या सीमेत घुसून एअर स्ट्राईक केला. याआधी सुद्धा पाकिस्तानने अशा प्रकारचे नियंत्रित हल्ले केले होते. मात्र, यावेळी अफगाणिस्तानने पाक सैन्याला चोख उत्तर दिलं. तालिबानच्या संरक्षण मंत्रालयाने पाकिस्तानी सैन्य चौक्यांवर हल्ल्याची माहिती दिली. सोबतच अफगाणिस्तानच्या सुरक्षेसाठी कोणत्याही आक्रमक कारवाईला प्रत्युत्तर देण्यासाठी, तालिबान सज्ज आहे, असे विधान करून, पाकिस्तानला एक प्रकारे धमकीच दिली.पाकिस्तानविरोधात थेट कारवाई करण्याची तालिबानची ही पहिलीच वेळ असली, तरी तालिबानने याआधी सुद्धा पाकिस्तानविरोधात सैन्य कारवाई करण्याची धमकी दिली होती. पाकिस्तान आणि तालिबानमधील वादांची तीन मुख्य कारणं. यातील पहिले कारण की, अफगाणिस्तानच्या जमिनीवरून पाकिस्तानमध्ये होत असलेल्या दहशतवादी कारवाया. पाकिस्तानचा आरोप आहे की, अफगाणिस्तानमध्ये पाच हजार ते सहा हजार ’टीडीपी’चे दहशतवादी आणि त्यांचे कुटुंब शरण घेत आहेत. अफगाणिस्तानमध्येच राहून ते पाकिस्तानमध्ये दहशतवादी हल्ले करतात.

’टीडीपी’नंतर पाकिस्तान आणि तालिबानमधील वादाचा दुसरा मुद्दा आहे, २ हजार, ६४० किमी लांबीची सीमा ‘ड्यूरंड लाईन.’ पाकिस्तान ‘ड्यूरंड लाईन’ला आंतरराष्ट्रीय सीमा मानतो. मात्र, तालिबान या सीमारेषेला मान्यता देत नाही. पाकिस्तानने २०१७ मध्ये बेकायदेशीर घुसखोरी आणि दहशतवादी कारवाया थांबवण्यासाठी या सीमेवर कुंपण घालण्याचे काम हाती घेतले होते. मात्र, तालिबान या सीमारेषेला मान्यता देत नसल्यामुळे, तालिबानने हे कुंपण नष्ट करण्याची मोहीम हाती घेतली आहे.तालिबान आणि पाकिस्तान यांच्यातील या संघर्षाची झळ निष्पाप अफगाणी निर्वासितांना बसत आहे. पाकिस्तानने अफगाणी निर्वासितांना बाहेर काढण्याचा निर्णय हा निराशतेतून घेतला होता. त्यामुळे तालिबान आपल्या नियंत्रणात राहील, अशी भाबडी समज पाकिस्तानची होती. ती आता फोल ठरली आहे. धर्माच्या नावाखाली स्वार्थासाठी झालेली ही मैत्री आता तुटली आहे. या परिस्थितीवर पाकिस्तानींना सध्या एकच गाणं आठवत असेल की, ’दोस्त दोस्त ना रहा, प्यार प्यार ना रहा!’