बौद्ध भिक्षूंवर अत्याचार

तथागतांचा जन्म नेपाळ-लुंबिंनीमधला. तथागत गौतम बुद्धांना ज्ञान प्राप्त झाले ते भारतातील बिहार येथील बोधगया येथे. पुढे उत्तर प्रदेशातील कुशीनगर येथे तथागतांचे महानिर्वाण झाले. थोडक्यात, बौद्ध धर्माचे मूळच भारत आहे. याबद्दलही चीनला भयंकर असूया. कारण, जगभरातले बुद्धधर्मीय देश आस्थेचे प्रतीक म्हणून भारताकडे पाहतात. धम्माचा देश म्हणून आदर देतात. हे सगळे पाहून चीनचा तीळपापड होत असतो.जग भारताला बुद्धाचा देश मानते, तर ते तसे न होता नेपाळला बौद्ध आस्थांचे केंद्र म्हणून विकसित करायचे. पुढे ते केंद्र चीनमध्ये वळवावे, असे चीनचे मनसुबे. त्यासाठी चीन एक एक योजना आखतो. उदाहरणार्थ, तथागत गौतम बुद्धांचा जन्म नेपाळमधील लुंबिनीमधला. चीनने लुंबिनी आणि काठमांडूदरम्यान एक रेल्वे लाईन विकसित केली. पुढे हा मार्ग ल्हासा आणि चीनच्या इतर बौद्ध स्थळांना जोडण्यात येणार आहे. २० २१ साली चीनने ‘दक्षिण चीन सागर बौद्ध धर्म फाऊंडेशन’ ही संस्था सुरू केली. दुसरीकडे चीनने पाकिस्तानमधील स्वात घाटातील गांधार परिसरालाही विकसित करण्याचा घाट घातला. का? तर उत्खननात तिथे जुने बौद्धविहार आढळले. नेपाळ आणि पाकिस्तान येथील बौद्धस्थळांना विकसित करून चीनशी जोडायचे, असे चीनचे नियोजन. आता कुणी म्हणेल की काय झाले? चीन धम्माचे काम करत आहे. पण, हे साफ खोटे आहे.