डेहराडून : न्यायालयाच्या आदेशानुसार उत्तराखंडमधील हल्दवानी येथे अतिक्रमण हटवण्याचे काम सुरू झाले होते. यानंतर कट्टरपंथीयांनी पोलिस दल आणि पालिकेच्या कर्मचाऱ्यांवर हल्ला केला. या हल्ल्यात ३०० हून अधिक अधिकारी जखमी झाले आहेत. कट्टरपंथीयांनी केवळ पोलिसांवर दगडफेकच केली नाही तर त्यांच्यावर पेट्रोल बॉम्ब फेकले आणि वाहनेही पेटवली. या घटनेनंतर पोलिसांनी आरोपींची ओळख पटवून त्यांना अटक करण्यास सुरुवात केली आहे.
दरम्यान, ‘द वायर’ वेबसाईटवर या हिंसाचाराचा प्रसार करण्याचे काम सुरू झाले आहे. हल्दवानी हिंसाचारावर एक पॅनेल चर्चा आयोजित केली होती, जी अरफा खानम शेरवानी यांनी होस्ट केली. या पॅनल डिस्कशनमध्ये सरकारी जमिनीवर अतिक्रमण करून त्यांना सोडवण्यासाठी गेलेल्या पोलिसांवर हल्ला करणाऱ्या कट्टरपंथीयांची बाजू घेतली.
पॅनल डिस्कशनमध्ये अरफा खानम शेरवानी व्यतिरिक्त पत्रकार त्रिलोचन भट्ट, पत्रकार उमाकांत लखेरा आणि वायरचे दुसरे संपादक याकूत अली यांचा समावेश होता. या पॅनल डिस्कशनमध्ये दगडफेक करणाऱ्या कट्टरपंथीयांची बाजू घेत पॅनेलचे सदस्य त्रिलोचन भट्ट म्हणाले की, "त्यांच्या (कट्टरपंथीयांवर) एनएसए अंतर्गत गुन्हा दाखल करण्याची तयारी सुरू आहे. सर्वात मोठी गोष्ट ही आहे. त्यांनी दगडफेक केली हे मान्य करू, पण धार्मिक स्थळ वाचवण्यासाठी त्यांनी धार्मिक भावनेतून असे केले असावे. मग त्यांच्यावर रासुका लादणार का? ते दहशतवादी नाहीत. त्यांना थेट लक्ष्य केले जात आहे."
या संपूर्ण पॅनल डिस्कशनमध्ये अँकरपासून ते पॅनलमध्ये सहभागी झालेल्या लोकांपर्यंत तेथील कट्टरपंथीयांची निर्दोष ठरवण्यात आले. या हल्ल्याचा संपूर्ण ठपका प्रशासन आणि राज्य सरकारवर टाकण्यात आला. चर्चेदरम्यान लोकांनी सांगितले की, निवडणुका पाहून मुस्लिमांना भडकावण्यात आले.