रणदीप हुडा दिग्दर्शित स्वातंत्र्यवीर सावरकर चित्रपट ‘या’ दिवशी होणार प्रदर्शित

 

 

मुंबई : प्रखर राष्ट्रवादाचे कालातीत विचारधन निर्माण करुन कालजयी ठरलेल्या स्वातंत्र्यवीर सावरकर यांच्या जीवनावर आधारित 'स्वातंत्र्यवीर सावरकर' हा चरित्रपट लवकरच भेटीला येणार आहे. हिंदी चित्रपटसृष्टीतील विविधांगी भूमिका साकारणारा अभिनेता रणदीप हुड्डा सावरकरांची व्यक्तिरेखा साकारणार असून त्याने या चित्रपटाच्या दिग्दर्शनाची धुरा देखील हाती घेतली आहे. या चित्रपटाच्या माध्यमातून रणदीप त्याचा हिंदी चित्रपटसृष्टीतील दिग्दर्शकीय प्रवास देखील सुरु करत आहे. मराठी आणि हिंदी अशा दोन्ही भाषेत हा चित्रपट पाहता येणार असून २२ मार्च रोजी हा प्रदर्शित होणार आहे.

 

आपले मनोगत व्यक्त करताना रणदीप म्हणाला, “स्वातंत्र्यवीर सावरकर यांची व्यक्तीरेखा साकारताना त्यांनी भोगलेली काळ्या पाण्याची शिक्षा मी चित्रपटात त्यांची व्यक्तिरेखा साकारताना अनुभवली. देशासाठी त्यांनी जो संघर्ष केला तो जगासमोर आला पाहिजे याच अट्टहासामुळे मी या चित्रपटाचे दिग्दर्शक देखील करण्याचा निर्णय घेतला”.

 

 

 

रणदीप हुड्डा दिग्दर्शित 'स्वातंत्र्यवीर सावरकर' या चित्रपटाची निर्मिती झी स्टुडिओज, आनंद पंडित, रणदीप हुड्डा, संदीप सिंह आणि योगेश राहर यांनी केली असून रुपा पंडित, सॅम खान, अनवर अली, पांचाली चक्रवर्ती यांनी सह निर्मिती केली आहे. २२ मार्च रोजी प्रदर्शित होणाऱ्या या चित्रपटात रणदीप हुड्डा, अंकिता लोखंडे आणि अमित सियाल यांच्या प्रमूख भूमिका असणार आहेत.