कर्तृत्वाचे फळ

 

 

 

 

 

देवेंद्र फडणवीस यांच्या नेतृत्वात आता आपल्या राज्याचा कारभार सुरू झाला आहे. संत-महंताचे आशीर्वाद घेत, आद्यदेवता श्रीगणेशाचे दर्शन आणि गोमातेचे पूजन करीत, त्यांनी मुख्यमंत्रिपदाची शपथ घेतली. राज्याला हवा असलेला, जनतेला हवा असलेला, एक आश्वस्त असा सुसंस्कृत चेहरा त्यांच्या रुपात कार्यरत झाला. गेल्या काही काळात राज्यातील राजकीय संस्कृतीत आलेले घाणेरडे वादळ आता शमण्याची चिन्हे दिसू लागली आहेत. राज्यातील जनतेने मतदानातून याची सुरुवात करून दिली आणि आपल्या सुसंस्कृत राज्याच्या राजकीय संस्कृतीत, पुन्हा एकदा खेळीमेळीचे आणि राज्याच्या नावाला शोभेल असे राजकीय वातावरण तसेच कार्यसंस्कृती बघायला मिळेल, असे संकेत मिळू लागले आहेत. जसे निसर्ग आपल्याला प्रत्येक ऋतूतून त्याच्या आल्हाददायी आगमनाचे संकेत देत असतो, तसेच काहीसे या निमित्ताने आणि देवेंद्र फडणवीस यांच्या कार्यक्षम व्यक्तिमत्त्वातून मिळू लागले आहेत. त्यांनी आजतागायत केलेली लोकांची सेवा आणि राजकीय वर्तन हे जनतेने बघितले असल्याने, आणि त्या तुलनेत त्यांच्या विरोधकांनी त्याच्यांशी केलेला अतिरेकी विरोध लक्षात आल्यान, आता आपल्या राज्याच्या प्रगतीला साजेशी वातावरणनिर्मिती या निमित्ताने सुरू झाल्याचे म्हणता येईल. रोजची एकमेकांवरील गरळ आणि नेहमी त्यालाच माध्यमांमधून दिली जाणारी प्रसिद्धी , यामुळे कंटाळलेल्या आणि मनातून संतप्त झालेल्या सुज्ञ मतदारांनी विरोधकांच्या या कटकारस्थानांचा सोक्षमोक्ष लावल्यानंतर, देवेंद्र यांच्या नेतृत्वातच राज्याच्या विकासाची गाडी रूळावर येण्यास वेळ लागणार नाही. किंबहुना, एकनाथ शिंदे यांच्या नेतृत्वात आणि देवेंद्र आणि अजित पवार यांच्या साथीने, ती गेल्या अडीच वर्षांत आल्याचे जनतेने बघितले होते. आता हा वेग संतुलित ठेवण्याचा आणि जनतेची कामे गतीने पूर्ण करण्याचा काळ सुरू झाल्याची भावना, तीन आश्वस्त चेहर्‍यांमुळे निर्माण झाली आहे, असे म्हणायला बराचसा वाव आहे. एकनाथ शिंदे यांचे लोकांमध्ये जाऊन मिसळणे, अजित पवारांच्या निर्णायक कार्यशैलीचा धडाका आणि देवेेंद्र यांचे सर्वांना सोबत घेऊन जनतेपर्यंत कल्याणकारी कार्य नेणे ही कार्यपद्धती लोकांनी ओळखली होती, म्हणूनच हे सुदिन आले. आता जनतेला हे सुसंस्कृत कर्तृत्वाचे फळ मिळाले, असे मोठे समाधान आहे.