मुंब्य्रात छत्रपती शिवाजी महाराजांचे मंदिर उभारून दाखवा!

मुंबई : ( Mumbra ) महाविकास आघाडीची सत्ता आल्यास सुरतमध्ये शिवरायांचे मंदिर उभारण्याची घोषणा करणार्‍या उद्धव ठाकरेंना उपमुख्यमंत्री देवेंद्र फडणवीस यांनी जोरदार प्रत्युत्तर दिले. “तुमच्यात हिंमत असेल, तर आधी मुंब्र्यात छत्रपती शिवाजी महाराजांचे मंदिर उभारून दाखवा,” असे थेट आव्हान त्यांनी दिले.

मंगळवार, दि. ५ नोव्हेंबर रोजी महायुतीने कोल्हापुरातून अधिकृतपणे प्रचाराचा नारळ फोडला. यावेळी आयोजित सभेत फडणवीस बोलत होते. या कार्यक्रमात मुख्यमंत्री एकनाथ शिंदे, उपमुख्यमंत्री अजित पवार, केंद्रीय मंत्री रामदास आठवले यांच्यासह महायुतीचे वरिष्ठ नेते उपस्थित होते.

यावेळी बोलताना फडणवीस म्हणाले की, “कोल्हापुरातून सुरुवात केली की विजय नक्की मिळतो. उद्धव ठाकरे या ठिकाणी आले होते. ते म्हणाले की, “महाराजांचा इंग्रजांवर राग होता म्हणून सुरत लुटली. उद्धव ठाकरेंना आता औरंगजेबाचे नाव घ्यायलाही लाज वाटत आहे. तुम्ही बाळासाहेबांच्या नावापुढचे ‘हिंदुहृदयसम्राट’ काढून टाकले. सुरतेला जाऊन महाराजांचे मंदिर बांधणार म्हणालात. २२ वर्षांपूर्वीच सुरतमध्ये मोदींनी पुतळा उभारला आहे.

हे महाविकास आघाडीचे नेते नेहमी खोटे बोलतात. हे ज्या घोषणा करतात, त्या कधीच पूर्ण करत नाहीत. उद्धव ठाकरे यांनी घोषणा केली की, ते संपूर्ण जिल्ह्यात शिवरायांचा पुतळा उभारणार आहेत. मी त्यांना आव्हान देतो, चला मग मुंब्र्यात आपण शिवरायांचा पुतळा उभारू आणि छत्रपतींना मानवंदना देऊ,” असे फडणवीस म्हणाले.