अमेरिकेतील भारतीय मतदार कसा विचार करीत आहेत?

 

1) कॅलिफोर्निया - पाच लक्ष (1.4 टक्के), 2) न्यूयॉर्क - तीन लक्ष (1.6 टक्के), 3) न्यू जर्सी - तीन लक्ष (3.3 टक्के), 4) टेक्सास- 2.5 लक्ष (1 टक्के), 5) इलिओनॉईस - दोन लक्ष (1.5 टक्के), 6) फ्लोरिडा - 1.3 लक्ष (0.7 टक्के), 7) व्हर्जिनिया - एक लक्ष (1.3 टक्के), 8) पेन्सिलव्हॅनिया - एक लक्ष (0.8 टक्के), 9) जॉर्जिया - एक लक्ष (एक टक्के), 10) मेरी लॅण्ड - 0.8 लक्ष (1.4 टक्के), 11) मॅसॅच्युसेट्स - 0.8 लक्ष (1.2 टक्के), 12) मिशिगन - 0.8 लक्ष (0.8 टक्के), 13) ओहायहो - 0.6 लक्ष (0.6 टक्के), 14) वॉशिंग्टन - 0.6 लक्ष (0.9 टक्के), 15) नॉर्थ कॅरोलना - 0.6 लक्ष (0.6 टक्के), 16) कनेक्टिकट - 0.5 लक्ष (1.3 टक्के);

अ) रिझोना - 36 हजार (0.6 टक्के), ब) मिनेसोटा - 33 हजार (0.5 टक्के), क) डेलावेअर - 11 हजार (1.3 टक्के), ड) नॉर्थ हॅम्पशायर - आठ हजार (0.6 टक्के), इ) वॉशिंग्टन (डिस्ट्रिक्ट ऑफ कोलंबिया) - पाच हजार (0.9 टक्के), फ) कॅनसस - 14 हजार (0.5 टक्के)

ट्रम्प प्रशासनानेही भारतातील अंतर्गत प्रश्नांबाबत, कधीही भारताविरोधात भूमिका घेतलेली नव्हती. यात जसे काश्मीर आले, तसेच अरुणाचलही आले आहे. जागतिक व्यासपीठावर भारताचे स्थान कसे उंचावेल, व्यक्त होण्याची संधी भारताला कशी मिळेल यासाठी ट्रम्प यांचा प्रयत्न असतो. याउलट डेमोक्रॅट पक्षाचे सर्व अध्यक्ष (यात खुद्द बायडेनही येतात, अपवाद - जॉन एफ केनेडी), सर्व दोष भारताच्याच माथी मारून उपदेशाचे डोज देत आले आहेत. अध्यक्षपदाच्या मुस्लीम धार्जिण्या असा आरोप असलेल्या सुविद्य उमेदवार व कायदेपंडित कमला हॅरिस, स्वत:ची ओळख आफ्रिकन - अमेरिकन अशी पूर्वी करून देत असत. आता मात्र त्यांना आपला भारतीय वारसा आठवतोय. बहुदा यामुळेच कमला हॅरिस यांची भारतीय - अमेरिकनांवर फारशी पकड असल्याचे दिसत नाही. आजवर तसा त्यांनी कधी प्रयत्नही केलेला नाही. उलट त्या सातत्याने आपल्या आफ्रिकन वारशावर भर देत भारत आणि भारतीयांच्या जिव्हाळ्याच्या प्रश्नांबाबत विरोधी भूमिकाच घेत आल्या आहेत. याचे एक कारण असे असेल का, की अमेरिकेत आफ्रिकनांची संख्या 15 टक्क्यांच्या वर आहे, तर अमेरिकेच्या कोणत्याही राज्यात एखादा अपवाद वगळता भारतीय 1.5 टक्क्यांपेक्षा जास्त नाहीत.

भारतीय - अमेरिकन नागरिकांचा कुणीना कुणी नातेवाईक भारतात असतोच/असणारच. अमेरिकेने भारताला सन्मानाने वागवावे. तसेच चीनच्या बाबतीत अमेरिकेने भारताला साथ द्यावी, अशी भारतीयांची अपेक्षा असते. ही साथ ट्रम्प व रिपब्लिकन पक्षच देईल, असा त्यांचा विश्वास आहे. हा संदेश हे नातेवाईक आपल्या अमेरिकेतील बांधवांना नेमकेपणाने पोचवत असतात.

मिशिगन, पेन्सिलव्हॅनिया, जॉर्जिया, नॉर्थ कॅरोलिना, व्हर्जिनिया, टेक्सास या राज्यातून एकूण 538 इलेक्टर्सपैकी 118 इलेक्टर्स निवडले जातात. या राज्यात एकूण पाच लक्षाहून अधिक अमेरिकन - भारतीय मतदार आहेत. त्यामुळे 118 इलेक्टर्सच्या निवडीवर या मतदारांचा प्रभाव पडू शकेल, असे मानले/म्हटले जाते.

अमेरिकन लोकसंख्येचे वंशश: विभाजन असे आहे. गोरे 77.3 टक्के आहेत. पण, यापैकी 23.8 टक्के गोरे डोनाल्ड ट्रम्प यांचे विरोधक आहेत. यात प्रामुख्याने क्युबन, मेक्सिकन, दक्षिण किंवा मध्य अमेरिकन लोकांचा समावेश असतो. पण, उरलेल्या 53.5 टक्के गोर्‍यांपैकी बहुसंख्य अमेरिकन गोर्‍यांचा डोनाल्ड ट्रम्प यांना फार मोठ्या प्रमाणात पाठिंबा आहे. काळ्यांची टक्केवारी 16.9 टक्के आहे. हे डोनाल्ड ट्रम्प यांच्या विरोधातच मतदान करणार हे सांगायला नको. अमेरिकन - भारतीय टक्केवारी पूर्ण देशाचा विचार करता, एक टक्क्यांपेक्षाही कमी आहे. पण, यातील बहुसंख्य भारतीय मतदार डोनाल्ड ट्रम्प यांच्या धोरणांवर खूश असलेले आहेत. एच1बी व्हिसाबाबतचे ट्रम्प प्रशासनाचे धोरण तिथे स्थायिक झालेल्या भारतीयांनाही आवडत नसले, तरी या धोरणाचा अमेरिकेत नोकरीसाठी येऊ इच्छिणार्‍यांना, ग्रीन कार्ड मिळवू इच्छिणार्‍यांना जसा त्रास होतो, तसा तो अमेरिकेत स्थायिक होऊन नागरिकत्व आणि मताधिकार मिळालेल्या भारतीयांना होत नाही, हेही लक्षात घेतले पाहिजे. एकेकाळी हे डेमोक्रॅट पक्षाला एक गठ्ठा मतदान करीत असत. पण, मोदींचा भारतातील उदय, त्यांची धोरणे व अमेरिकेतील विद्यमान शासन आणि प्रशासनव्यवस्थेशी भारताचे असलेले सलोख्याचे संबंध, यामुळे भारतीय मतदार फार मोठ्या प्रमाणावर रिपब्लिकन पक्षाकडे वळले आहेत. कलिस्तान समर्थकांबाबतची बायडेन व हॅरिस प्रशासनाचे धोरण तेथील भारतीयांना आवडलेले नाही. यामुळेही देशभरातल्या प्रत्येक राज्यात डोनाल्ड ट्रम्प यांची मते (पॉपुलर व्होट्स) काहीना काही प्रमाणात वाढणार आहेत आणि तेवढ्यानेच डेमोक्रॅट पक्षाची मते कमी होणार आहेत.

\ 

मुळात अमेरिकेतील भारतीय समाज डेमोक्रॅट पक्षाला अनुकूल राहिलेला होता व आहे ही. मोदींच्या दमदार व धाडसी पुढाकारांमुळे भारतात होत असलेल्या परिवर्तनाने अमेरिकन - भारतीय अतिशय प्रभावित झाले आहेत. काश्मीरला भारतापासून वेगळे ठेवणारे 370 कलम कधी दूर होऊ शकेल, ही आशा अमेरिकन - भारतीयांनी केव्हाच सोडून दिली होती. सिटीझनशीप (अमेन्डमेन्ट) क्टबद्दल तर त्यांच्या मनात विचारही येण्याची शक्यता नव्हती. पुढची चार वर्षे अमेरिकेत ट्रम्प आणि भारतात मोदी ही जोडी दोन्ही देशांना प्रगतीच्या एका नवीन उंचीवर घेऊन जाईल, असे वाटणार्‍यांची संख्या अमेरिकेत वाढलेली दिसते आहे.

मतदारनोंदणी आणि मतदान या दोन्ही बाबतीत अमेरिकन - भारतीय मतदार जागरूक असल्याचे आढळून आले आहे. 2016 व 2020 सालामध्ये त्यांची मतदान करण्याची टक्केवारी अनुक्रमे 62 टक्के व 71 टक्क्यांच्या जवळपास म्हणजे अमेरिकेच्या राष्ट्रीय सरासरीपेक्षा जास्त होती. 2024 सालामध्ये ही टक्केवारी आणखी वाढते किंवा कसे, हे पाहणे औत्सुक्याचे ठरणार आहे. तशी ती वाढल्यास रिपब्लिकन पक्षाचे पारडेच जड होण्याची शक्यता आहे.

2020 सालच्या अध्यक्षीय निवडणुकीत अंदाजे 240 दशलक्ष लोक मतदान करण्यास पात्र होते आणि त्यापैकी अंदाजे 66.1 टक्के लोकांनी मतपत्रिका सादर केल्या. एकूण 158,427,986 मते. अंदाजे 81 दशलक्ष पात्र मतदारांनी मतदान केले नाही.

अमेरिकेतील भारतीय मतदारांपैकी 96 टक्के मतदार या निवडणुकीत मतदानात सहभागी होतील. 60 टक्के भारतीय अमेरिकन मतदार केंद्रावर स्वत: जाऊन मतदान करतात. तर 25 टक्के ई-मेल करून मतदार करतात, तर 9 टक्के निवडणूक कार्यालयात जाऊन मतदान करतात.

या वर्षी 55 टक्के भारतीय अमेरिकन मतदारांनी आपला कल डेमोक्रॅट पक्षाकडे आहे. असे नोंदणीचे वेळीच जाहीर केले आहे. (अमेरिकेत अशी तरतूद आहे) 2020 सालामध्ये ही टक्केवारी 59 टक्के इतकी होती.

यावर्षी 26 टक्के भारतीय अमेरिकन मतदारांनी आपला कल डेमोक्रॅट पक्षाकडे आहे, असे नोंदणीचे वेळीच जाहीर केले आहे. 2020 सालामध्ये ही टक्केवारी 21 टक्के इतकी होती.

यावर्षी 25 टक्के भारतीय अमेरिकन मतदारांनी आपला कल जाहीर केलेला नाही. 2020 सालामध्ये ही टक्केवारी 28 टक्के इतकी होती.