‘आमदार प्रशांत ठाकूर यांच्याकडून लोकहिताची कामे होतच राहतील’

पनवेल : “आमदार प्रशांत ठाकूर ( Prashant Thakur ) यांनी पनवेलच्या विकासाच्या जोरावर विजय मिळवत विजयाचा चौकार मारला आहे. सामाजिक बांधिलकीने त्यांच्याकडून लोकहिताची कामे यापुढेही सुरूच राहणार आहेत. त्यामुळे आमदार प्रशांत ठाकूर यापुढे विजयाचा षटकारही मारणार आहेत,” असा ठाम विश्वास माजी खासदार रामशेठ ठाकूर यांनी व्यक्त केला.

आमदार प्रशांत ठाकूर यांच्या विजयानिमित्त पदाधिकारी, कार्यकर्ते, हितचिंतकांकडून रामशेठ ठाकूर यांना शुभेच्छा देण्यात येत आहेत. त्या अनुषंगाने मनोगत व्यक्त करताना ते बोलत होते. यावेळी त्यांनी सर्वांचे आभार मानले. पनवेल विधानसभेचे नेतृत्व करताना आमदार प्रशांत ठाकूर जबाबदारीने काम करीत आहेत. त्यामुळे वडील म्हणून आपल्याला अभिमान असल्याचेही त्यांनी यावेळी सांगितले.

रामशेठ ठाकूर म्हणाले की, “भाजप प्रथम राष्ट्र, नंतर पक्ष आणि त्यानंतर स्वतः हे देशाच्या विकासाचे मूळ उद्दिष्ट्य घेऊन काम करीत आहे. या विचारधारणेतून आमदार प्रशांत ठाकूर नेहमीच काम करतात. सर्वसामान्यांचा विचार त्यांच्या कार्यातून दिसत असल्याचे त्यांनी यावेळी अधोरेखित केले.

लोकप्रतिनिधी म्हणून काम करताना मतदारसंघाचा विकास आणि जनतेच्या प्रश्नांची सोडवणूक करण्याची जबाबदारी त्यांनी कायम उचलली आहे. प्रत्येक समाजातील वर्ग आमदार ठाकूर यांना मानतो. त्यामुळे त्यांची सामाजिक बांधिलकीने नाळ जोडली गेली आहे. आमदार ठाकूर पनवेलच्या विकासासाठी काम करीत असतात आणि त्या अनुषंगाने त्यांनी स्वतःला या कार्यात झोकून दिले आहे.

चारवेळा निवडून येणे हे सहज नसते. लोकांची कामे केल्यानंतरच हे यश मिळत असते, असे माजी खा. रामशेठ ठाकूर यांनी आवर्जून नमूद केले. आमदार ठाकूर या मतदारसंघातील प्रत्येक घटकाचा विकास करण्यासाठी कटिबद्ध राहिले आहेत. पनवेलच्या पिण्याच्या पाण्याच्या प्रश्न येत्या वर्षात कायम स्वरुपी सुटणार आहे आणि त्यासाठी आमदार ठाकूर यांनी घेतलेले कष्ट कामी येत असल्याचे ते म्हणाले.

 

“पनवेल विधानसभा मतदारसंघाच्या बाबतीत आमदार प्रशांत ठाकूर यांनी विकासकामांवर भर दिला. त्यामुळे या मतदारसंघात मोठ्या प्रमाणात विविध प्रकारची विकासकामे झाली. पनवेल विधानसभा मतदारसंघ हा राज्यातील सर्वात मोठा दुसर्‍या क्रमांकाचा मतदारसंघ आहे. त्यामुळे प्रचाराच्यावेळी प्रत्येक मतदारापर्यंत पोहोचणे तसे कठीणच आहे. मात्र, आमदार ठाकूर विकासकामांच्या माध्यमातून प्रत्येक व्यक्तीपर्यंत पोहोचले आहेत,” असे रामशेठ ठाकूर म्हणाले. महायुतीच्या सर्व पदाधिकार्‍यांचे व कार्यकर्त्यांचे त्यांनी यावेळी आभार मानले.