मुख्यमंत्रीपदासाठी फडणवीसांच्या नावाला ५ अपक्ष आमदारांचा पाठिंबा!

 

 

मुंबई : विधानसभा निवडणूकीचा निकाल लागला असून आता महायूतीचा मुख्यमंत्री कोण होणार याबाबत अनेक तर्कवितर्क लावले जात आहेत. दरम्यान, मुख्यमंत्रीपदासाठी देवेंद्र फडणवीसांच्या नावाला ५ अपक्ष आमदारांनी पाठिंबा दिल्याची माहिती पुढे आली आहे.

 

नुकत्याच पार पडलेल्या विधानसभा निवडणूकीत १३२ जागांवर विजय मिळवत भाजप सर्वात मोठा पक्ष ठरला आहे. तर शिवसेनेला ५७ आणि राष्ट्रवादी काँग्रेसला ४१ जागा मिळाल्या आहेत. निवडणूकीच्या निकालानंतर आता मुख्यमंत्रीपदाची चर्चा राजकीय वर्तुळात सुरु झाली आहे.

 

 

देवेंद्र फडणवीस, एकनाथ शिंदे आणि अजित पवार या तिघांपैकी कोण मुख्यमंत्री बनणार? याकडे सर्वांचेच लक्ष लागले आहे. अशातच देवेंद्र फडणवीसांच्या नावाला ५ अपक्ष आमदारांनी पाठिंबा दिला आहे. या पाच अपक्ष आमदारांमध्ये राष्ट्रीय समाज पक्षाचे रत्नाकर गुट्टे, जनसुराज्य पक्षाचे विनय कोरे आणि अशोकराव माने, युवा स्वाभिमान पक्षाचे आमदार रवी राणा आणि अपक्ष आमदार शिवाजी पाटील यांचा समावेश आहे.