अमित ठाकरेंना समर्थन देण्यासाठी महायुतीच्या नेत्यांशी चर्चा करणार

 

 

 

वांद्रे येथे माध्यमांशी संवाद साधताना शेलार बोलत होते. ते म्हणाले, भले उद्धव ठाकरेंना वाटत नसेल, तरी महायुतीने नाते जपायला हवे, असे मला वाटते. सदा सरवणकर यांना आमचा विरोध नाही. पण, महायुती म्हणून सगळ्यांनी एक चांगली राजकीय भूमिका घ्यावी. त्यातून जनतेत एक संदेश जाईल, अशी भूमिका आशिष शेलार यांनी मांडली.

 

नाना पटोलेंच्या आरक्षणविरोधी भूमिकेवर टीका करताना शेलार म्हणाले, परदेशात राहुल गांधी यांनी अकलेचे दिवाळे दाखवून दिले. त्याला नाना पटोले यांनी समर्थन करून आरक्षणाचा अपमान केला आहे. त्यामुळे पटोले यांनी महाराष्ट्राची माफी मागावी. चैत्यभूमीवर महामानव डॉ. बाबासाहेब आंबेडकर यांच्यासमोर जाऊन नाक घासावे. दुसरे म्हणजे, ज्या जितेंद्र आव्हाड यांनी महामानव डॉ. बाबासाहेब आंबेडकर यांचा फोटो फाडला, त्या आव्हाडांनी आरक्षणाच्या विषयावर तर बोलूच नये, असे टीकास्त्र आशिष शेलार यांनी डागले.

 

 

नवाब मलिकांना आमचा विरोध आहे. त्यांना तिकिट द्यावे, की नाही, याचा निर्णय त्यांच्या पक्षाचे नेते घेतील. परंतु, दाऊदशी संबंधित असलेल्या नवाब मलिक यांचे काम भाजपचे कार्यकर्ते करणार नाहीत. आमची भूमिका ठाम असल्याचे आमदार आशिष शेलार यांनी स्पष्ट केले.