4000 कोटींचा खजिना, हिजबुल्लाहला निधी पुरवणाऱ्या बँकेवर इस्त्रायली हल्ला!
22 Oct 2024 17:19:41
नवी दिल्ली : इस्त्रायल आणि हिजबुल्लाह यांच्यात गेल्या काही काळापासून जोरदार संघर्ष सुरू आहे. त्यातच आता इस्रायली सुरक्षा दलांनी हिजबुल्लाहच्या दहशतवादी कारवायांसाठी निधी पुरवणाऱ्या बँकेवर बॉम्बहल्ला केला आहे. लेबनॉनमध्ये या बँकेच्या अनेक शाखांवर बॉम्बस्फोट झाले असून इस्रायलने हिजबुल्लाहने हॉस्पिटलखाली सोने आणि लाखो डॉलर्स लपवून ठेवल्याचा खुलासाही करण्यात आला आहे.
दरम्यान, दि. २१ ऑक्टोबर २०२४ इस्रायलने बेरूतमधील अल कार्द अल हसन नावाच्या वित्तीय संस्थेच्या शाखांवर बॉम्बफेक केली. ही इस्लामिक बँकिंग संस्था असून ती व्याजावर चालत नाही. हिजबुल्ला आपल्या आर्थिक कारवाया बँकेमार्फत चालवते, असा संस्थेवर आरोप देखील करण्यात आला आहे. २००७ मध्ये या संस्थेवर अमेरिकेने बंदी घातली होती. त्यानंतर देखील हिजबुल्ला लेबनीज लोकांना ही सुविधा वापरण्यासाठी प्रोत्साहित करत आहे.
मागील काळात या बँकेचाय सर्व्हर हॅक झाल्यानंतर खातेदारांची नावे समोर आली त्यात हिजबुल्लाहच्या दहशतवाद्यांची नावे देखील असल्याचे समोर आले होते. हिजबुल्लाह प्रमुख नसरुल्लाह याने समर्थकांना त्यांच्या पैशातील प्रत्येक पैसा या संस्थेत जमा करण्यास सांगितला. दरम्यान, सद्यस्थितीस झालेल्या संघर्षात इस्त्रायलने बेरूतमधील हिजबुल्लाच्या 15 शाखांना आपले आर्थिक कंबरडे मोडण्यासाठी लक्ष्य केले.
