उबाठा गटाची पहिली यादी स्क्रीनिंगसाठी १० जनपथला! नितेश राणेंची टीका

 

 

मुंबई : उबाठा गटाची पहिली यादी स्क्रीनिंगसाठी १० जनपथला गेली आहे, अशी टीका भाजप नेते नितेश राणेंनी केली आहे. रविवारी भाजपची पहिली यादी जाहीर करण्यात आली. यावर संजय राऊतांनी केलेल्या टीकेला आता नितेश राणेंनी प्रत्युत्तर दिले.

 

नितेश राणे म्हणाले की, "भाजपची पहिली यादी जाहीर झाली आणि संजय राऊतांनी त्यावर टीका केली. उबाठा गटाची पहिली यादी १० जनपथला स्क्रीनिंगसाठी गेली आहे. तिथून शिक्कामोर्तब झाल्यावर ती जाहीर होणार आहे. आम्ही कधीच दिल्लीसमोर झुकत नाही, असं बोलणारे संजय राऊत आणि त्यांच्या मालकांना प्रत्येकवेळी दिल्लीसमोर झुकावं लागतं," असे ते म्हणाले.

 

ते पुढे म्हणाले की, "भाजपचे सगळे उमेदवार कामाला लागले असून महायूती म्हणून आम्ही या स्पर्धेत अव्वल नंबर मिळवणार आहोत. महाविकास आघाडीत सुरु असलेला गँगवॉर थांबताना दिसत नाही. ज्या हॉटेलमध्ये मविआच्या बैठका सुरु आहेत त्याचं सीसीटीव्ही फुटेज तपासल्यास बिग बॉस हाऊसपेक्षाही चांगलं दृश्य बघायला मिळेल. प्रत्येकाला कसं जिंकायचं आहे, हेच तिथे बघायला मिळेल. त्यामुळे संजय राऊतांनी आमच्यावर बोलण्याआधी त्यांच्या घरातील गँगवॉर थांबवावा," असा खोचक सल्लाही नितेश राणेंनी राऊतांनी दिला आहे.