कांद्याची आयात अत्यल्प

 

 

केंद्र सरकारने किमान निर्यात मूल्य रद्द आणि निर्यात शुल्क निम्म्याने घटविल्याने भारतीय बाजारपेठेत कांद्याचे दर चढायला सुरुवात झाली. त्यामुळे बाजारपेठांमध्ये कांद्याला समाधानकारक दर मिळत आहेत. याचा फायदा कांदा उत्पादक शेतकर्‍यांना झाला. परंतु, ग्राहकांना रास्त दरात कांदा मिळावा यासाठी नाफेडने आपला बफर स्टॉक बाजारात विक्रीसाठी आणला. तसेच, अफगाणिस्तानवरून कांद्याची आयात केली आहे. या आयात करण्यात आलेल्या कांद्याचे प्रमाण इतके अत्यल्प आहे की, त्यातून एका शहराची दिवसभराची गरजदेखील भागविली जाणार नसल्याचे निर्यातदारांकडून सांगितले जात आहे. जिल्ह्यातील शेतकर्‍यांनी उन्हाळी कांद्याची मोठ्या प्रमाणावर साठवणूक केली होती. त्यामुळे अजूनही २५ ते ३० टक्के शेतकरी वर्गाकडे कांदा उपलब्ध आहे. जिल्ह्यातील बाजार समित्यांमध्ये हजारो टन कांदा विक्रीसाठी येत असल्याचे दिसून येते. या बाजारसमित्यांमध्ये साधारणपणे कांद्याला पाच हजार रुपये क्विंटल दर मिळत आहे. कांदा आयात केल्यानंतरही हे दर अजूनही टिकून आहेत. अशा स्थितीत पंजाबमधील जालंधर आणि अमृतसर या शहरांमध्ये ११ ट्रक मधून ३५० टनाच्या आसपास अफगाणिस्तानातून आयात केलेला कांदा दाखल झाला आहे.

 

दरम्यान, या आयात कांद्याच्या तुलनेत एकट्या नाशिक जिल्ह्यातून तब्बल ६० ते ७० टक्के म्हणजेच जवळपास ३५ ते ४० हजार क्विंटल आवक झालेला कांदा देशाच्या कानाकोपर्‍यात पाठवला जातो. तर अफगाणिस्तान येथून आयात केलेला कांदा अगदी किरकोळ स्वरूपात असल्याने देशांतर्गत बाजारपेठेवर याचा विपरीत परिणाम होण्याची सद्यस्थितीत शक्यता नसल्याचे दिसून येत आहे.

 

 

 

 

 

सध्या बाजारामध्ये अफगाणिस्तानच्या कांद्याला ३० ते ३५ रुपये किलो इतका दर मिळत आहे. तसेच, त्याचा रंग भडक लाल असून, चवीला भारतीय कांद्याच्या तुलनेत तो अगदी फिका आहे. त्यामुळे ग्राहकवर्ग त्याला फारशी पसंती देताना दिसत नाही. त्यामुळे हा कांदा बाजारपेठेत आला तरी, त्याचा भारतीय कांद्याच्या किमतीवर फारसा परिणाम होताना सध्या दिसत नाही.