विदुषकांचा ‘हसरा मेळावा’

 

विधानसभा निवडणुकीचे बिगुल वाजले असून, जवळपास प्रत्येकानेच आपापल्या रणवाद्यांचा नाद केला आहे. कुणी तुतारी फुंकली आहे, तर कोणी पांचजन्य फुंकला आहे. काही लांडग्यांनी मात्र उगाचच रुदन सुरू केले आहे. विधानसभा प्रचाराचा भाग म्हणून आज विरोधीपक्षाकडून ’गद्दारांचा पंचनामा’ सरकारचे अपयश प्रसिद्ध करण्यात आले असल्याचे सांगण्यात आले. त्यात विविध गोष्टींवर टीक करण्यात आली होती. मात्र, याचे नावच इतके मजेशीर ठेवले होते की, नेमके ’गद्दारांचा पंचनामा’, ‘गद्दारांच्या कृत्याचा पंचनामा’ की, ‘गद्दारांनी केलेला पंचनामा’ हेच कळेनासे झाले आहे. कारण, या प्रकाशन कार्यक्रमाच्यावेळी बसलेल्या प्रत्येकाने कायमच कशाशी ना कशाशी गद्दारी केलीच आहे. मात्र, यात काँग्रेसची गद्दारी सर्वात वरच्या दर्जाचीच. तरीही ते इतरांना ’गद्दार’ म्हणत फिरतात हा आत्मविश्वासही शिकण्यासारखा आहे.

 

या प्रकाशन सोहळ्यातील सर्वात लक्षणीय बाब म्हणजे, काँग्रेस यामध्ये बाजू मांडताना म्हणते की, “ज्यांनी शिवरायांच्या राज्यभिषेकाला विरोध केला, त्याच विचारधारेचे सरकार देखील छत्रपती शिवाजी महाराजांचा अपमान करत आहेत.” आजवर या काँग्रेसला सर्वकाळ पूजनीय असलेल्या पं. नेहरु यांनी शिवरायांचा उपमर्द पंतप्रधान असताना केला त्याबद्दल काँग्रेस कधी माफी मागणार? नेहरु चुकले, त्यांचे छत्रपतींबद्दलचे आकलन जुजबी होते, त्यांच्या हिंदुस्थानच्या इतिहासाचा अभ्यास तोकडा होता असे कधी सांगणार? याची प्रत्येक हिंदू चकोरचातकासारखी वाट पाहत असताना, हे बिलंदर दुसर्‍याकडे बोट दाखवून मोकळे होतात. अरे, ज्यांनी कित्येक वर्ष राष्ट्रीय बोर्डाच्या अभ्यासक्रमात मुघलांच्या सत्तेवर पानेच्यापाने खरडली, मात्र छत्रपती शिवराय असोत अथवा महाराणा प्रताप यांना तो सन्मान देण्याचा मोठेपणा जे दाखवू शकले नाही, ज्यांना अकबर भूमीपुत्र वाटतो. मात्र, हिंदू राजे ज्यांना बंडखोर वाटतात, १८५७ सालच्या स्वातंत्र्यसमराचीही ज्यांनी बंड म्हणून हेटाळणी केली, तेच काँग्रेस आज कोणाला गद्दार म्हणायचा अधिकार राखून आहे का, हे आधी पाटोले यांनी ध्यानात ठेवले पाहिजे. काँग्रेसच्या पापांचा इतिहास एवढा मोठा आहे की, ते इतरांना गद्दार म्हणूच तरे कसे शकतात? म्हणूनच शीर्षकातील ’गद्दार’ म्हणजे कोण, हा प्रश्न सामान्य जनतेच्या मनात अधिक गडद होतो आहे.