सुभेदारमधील 'आले मराठे' गाणं प्रदर्शित...

मुंबई : शिवराज अष्टकातील पाचवे पुष्प म्हणजे 'सुभेदार' चित्रपट. दिग्दर्शक दिग्पाल लांजेकर यांच्या शिवाष्टकातील 'सुभेदार' चित्रपट घोषणा झाल्यापासूनच चर्चेचा विषय ठरला आहे. तानाजी मालूसरेंच्या जीवनावर आधारित या चित्रपटाचे पोस्टर प्रेक्षकांचे लक्ष वेधून घेत असताना आता चित्रपटातील स्वराज्यासाठीच्या घनघोर रणसंग्रामात पराक्रमाची शर्थ करणाऱ्या धाडसी योद्ध्यांचं गाणं 'आले मराठे आज प्रदर्शित झाले आहे. 'आले मराठे' या गाण्याचे बोल दिग्पाल लांजेकर यांचे असून देवदत्त मनिषा बाजी यांनी या गाण्याला उत्कृष्ट संगीत दिले आहे. 'आले मराठे' गाणे ऐकताना अंगावर अक्षरश: काटा उभा राहात असून शिवरायांनी उभारलेले मराठ्यांचे साम्राज्य डोळ्यासमोर तराळते.

 

 

 

या चित्रपटात अजय पूरकरांनी सुभेदार तान्हाजी मालुसरेंची व्यक्तिरेखा साकारली आहे. त्यांच्या जोडीला चिन्मय मांडलेकर, मृणाल कुलकर्णी, स्मिता शेवाळे, अभिजीत श्वेतचंद्र, शिवानी रांगोळे, समीर धर्माधिकारी, उमा सरदेशमुख, अर्णव पेंढारकर आदी कलाकारांच्या महत्त्वपूर्ण भूमिका आहेत. ए.ए.फिल्म्स आणि एव्हरेस्ट एंटरटेनमेंटची प्रस्तुती असलेल्या 'सुभेदार' चित्रपटाची निर्मिती राजवारसा प्रोडक्शन, मुळाक्षर प्रोडक्शन, पृथ्वीराज प्रोडक्शन, राजाऊ प्रोडक्शन, परंपरा प्रोडक्शन यांनी केली आहे. प्रद्योत पेंढारकर, अनिल वरखडे, दिग्पाल लांजेकर, चिन्मय मांडलेकर, श्रमिक गोजमगुंडे, विनोद जावळकर, शिवभक्त अनिकेत जावळकर, श्रुती दौंड 'सुभेदार' चित्रपटाचे निर्माते आहेत. सुभेदार हा चित्रपट १८ ऑगस्ट रोजी महाराष्ट्रभरात प्रदर्शित होणार आहे.