ईशान्य भारतातील पहिले ‘एम्स’ आसाममध्ये, पंतप्रधानांनी केले उद्घाटन

पंतप्रधान नरेंद्र मोदी शुक्रवारी आसाम दौऱ्यावर होते. येथे त्यांनी ईशान्य भारतातील पहिल्या ‘एम्स’चे उद्घाटन केले. यावेळी ते म्हणाले, आजकाल नवनवीन आजार दिसून येत आहेत. मी देशात कुठेही जातो आणि गेल्या ९ वर्षात झालेल्या विकासाबद्दल बोलतो तेव्हा काही लोक नाराज होतात. त्यांनीही अनेक दशके देशावर राज्य केले, याचे श्रेय त्यांना का मिळत नाही, अशी त्यांची तक्रार आहे. श्रेयासाठी भुकेलेल्या लोकांनी आणि जनतेवर राज्य करण्याच्या भावनेने देशाचे खूप नुकसान केले आहे, असे पंतप्रधानांनी म्हटले.

यावेळी पंतप्रधानांनी गेल्या ८-९ वर्षांत ईशान्येकडील कनेक्टिव्हिटी वाढविण्यासाठी केलेल्या प्रयत्नांचा आणि रस्ते, रेल्वे आणि विमानतळाच्या पायाभूत सुविधांमध्ये दृश्यमान सुधारणांचा उल्लेख केला. भौतिक पायाभूत सुविधांसोबतच सामाजिक पायाभूत सुविधांनाही या प्रदेशात मोठी चालना मिळाली आहे कारण शिक्षण आणि आरोग्य सुविधांचा अभूतपूर्व पद्धतीने विस्तार करण्यात आला असल्याचेही त्यांनी नमूद केले.