प्रवीणसिंह परदेशी यांची BNHSच्या अध्यक्षपदी निवड

मुंबई (प्रतिनिधी): भारतीय प्रशासकीय सेवेत ज्येष्ठ सनदी अधिकारी म्हणुन काम केलेल्या प्रवीणसिंह परदेशी यांची बॉम्बे नॅचरल हिस्ट्री सोसायटी म्हणजेच बिएनएचएस (BNHS) या संस्थेच्या अध्यक्षपदी एकमताने निवड करण्यात आली आहे.

निवृत्त ज्येष्ठ सनदी अधिकारी प्रवीणसिंह परदेशी हे सध्या बिएनएचएसच्या उपाध्यक्षपदी कार्यरत होते. बिएनएचएसच्या गव्हर्निंग कॉन्सिलने एकमताने बॉम्बे नॅचरल हिस्ट्री सोसायटीच्या अध्यक्षपदी निवड करण्यात आली आहे. या निवड प्रक्रियेत गव्हर्निंग कॉन्सिलचे सदस्य रोहन भाटे , उषा लचुंगपा, डॉ.अनिश अंधेरिया , केदार गोरे , पिटर लोबो , कुलोज्योती लाखर , डॉ रघुनंदन चुंडावत , डॉ. आसद रहमानी, डॉ. शुभालक्ष्मी, डॉ.परवेश पांड्या, उपाध्यक्ष श्लोका नाथ, कोषाध्यक्ष कुंजन गांधी यांचा समावेश होता.

भारतातील वन्यजीव संशोधन क्षेत्रातील एक अग्रगण्य संस्था म्हणुन बिएनएचएसची ओळख आहे. १८८३ पासुन म्हणजेच गेली १४० वर्ष निसर्ग संवर्धनासाठी भारतात व भारताबाहेर या संस्थेचे मोठे काम आहे. भारतातील प्राणीविज्ञान, जैवविविधता क्षेत्रात संशोधन आणि संवर्धनाचे काम करणारी बॉम्बे नॅचरल हिस्ट्री सोसायटी (BNHS) ही सर्वांत प्राचीन संस्था आहे. पक्षी व वन्यजीव संशोधन, निसर्ग शिक्षण आणि जनजागृतीवर आधारित कृतीद्वारे निसर्गाचे संवर्धन आणि प्रामुख्याने जैवविविधता वाचवणे हे संस्थेचे ध्येय आहे. बिएनएचएस ही धोक्यात असलेल्या प्रजाती आणि अधिवासांच्या संवर्धनात उत्कृष्ट कार्य करणारी, स्वतःचे स्वातंत्र्य शास्त्रीय मत असलेली भारतातील अत्यंत प्रमुख अशी वैज्ञानिक संस्था आहे.

“बिएनएचएस सारख्या भारतातील अग्रगण्य संस्थेत आता परदेशी यांची अध्यक्षपदी निवड झाल्यामुळे त्यांच्या मोठ्या अनुभवाचा फायदा संस्थेस नवीन शिखरावर पोहचण्यासाठी नक्कीच होणार आहे”, असे मत बिएनएचएसचे गव्हर्निंग कौन्सिल सदस्य आणि मानद वन्यजीव रक्षक रोहन भाटे यांनी व्यक्त केले आहे.