स्वच्छ माझा महाराष्ट्र अभियान राज्यभर राबवणार; मुख्यमंत्री शिंदेंची घोषणा

Maharashtra Chief Minister Eknath Shinde

मुंबई : स्वच्छ माझा महाराष्ट्र अभियान राज्यभर राबवणार असल्याची घोषणा राज्याचे मुख्यमंत्री एकनाथ शिंदे यांनी केली. दरम्यान, मुख्यमंत्र्यांनी स्वच्छ माझा महाराष्ट्र या महास्वच्छता अभियानास प्रारंभ केला. त्यावेळी ते म्हणाले, प्रदूषण कमी करण्यासाठी पायाभूत सुविधांच्या विकासाबरोबरच पर्यावरण संवर्धनाकडे लक्ष वेधतानाच याकरिता झाडे लावण्याबरोबरच स्वच्छता अभियान प्रभावीपणे अंमलबजावणी करणे आवश्यक आहे.

तसेच, मुंबई शहरात राबवले जाणारे स्वच्छता अभियान आता राज्यात सर्वत्र राबविण्यात येईल, असेही मुख्यमंत्री शिंदे यांनी यावेळी सांगितले. गेटवे ऑफ इंडिया येथे झालेल्या या कार्यक्रमाला शालेय शिक्षण मंत्री दीपक केसरकर, आमदार सदा सरवणकर, माजी आमदार राज पुरोहित, उद्योगपती नादीर गोदरेज, मुंबई महापालिका आयुक्त आय. एस. चहल, अतिरिक्त आयुक्त अश्विनी भिडे, डॉ. सुधाकर शिंदे आदी उपस्थित होते.