रशियन महिलांचे म्हणणे...

नुकतेच एका चर्चच्या सोहळ्यात पुतीन म्हणाले की, “रशियन महिलांनी किमान आठ मुलांना तरी जन्माला घालावे. कारण, रशियाची लोकसंख्या घटते आहे.” गेल्या वर्षीही त्यांनी ‘ग्लोरी टू मदर हिरोईन’ संकल्पना सांगितली होती. यामध्ये दहा मुलांना जन्म दिलेल्या मातेला हा सन्मान दिला जाईल. तिला एक अरब रूबल म्हणजे १३ लाख रुपये प्रदान करण्यात येतील. इतकेच नाही तर गर्भपातासंदर्भातलेही कडक नियम रशियात आहेत. आठ ते दहा मुलांना जन्म द्या, असे पुतीन महिलांना सांगत असतानाच,

मॉस्कोमध्ये शेकडो महिला रशिया-युक्रेन युद्धाच्या पार्श्वभूमीवर रस्त्यावर उतरून म्हणत आहेत की, ‘आम्हाला युद्ध नको, शांती हवी आहे!’ या महिलांचा पती, भाऊ किंवा मुलगा रशिया-युक्रेन युद्धात सैनिक म्हणून सामील आहेत. महिलांनी पुतीन यांच्याकडे मागणी केली आहे की, रशिया-युक्रेन युद्धाला एक वर्षे, नऊ महिने झाले. एक वर्षे होऊन गेले, आता सैनिकांना परत मायदेशी बोलवा. युद्ध नको, शांती हवी! युद्ध दोन देशांत सुरू आहे. मात्र, त्याचे खर्‍या अर्थाने पडसाद उमटत आहेत, ते सैनिकांच्या कुटुंबावर. युद्धात लाखोंनी सैनिक जीवानिशी जातात. मात्र, त्या सैनिकाची पत्नी विधवा होते, त्या सैनिकाच्या मुलांच्या डोक्यावरचे पितृछत्र हरपते... रशियातील महिलांचे हेच म्हणणे.

रशिया-युक्रेन युद्ध समाप्तीची चिन्ह दिसत नाहीत. या युद्धाचा शेवट काय होणार, याचीही खात्री नाही. सुरुवातीला वाटायचे की, बलाढ्य रशिया काही दिवसांतच युक्रेनला नमवेल. पण, युद्धाला आता दोन वर्षं होतील. युद्धात सैनिकांची दुसरी फळी तयार करून, ती पाठवून आधीच्या सैनिकांना युद्धविश्रांतीही दिली जात नाही. या सगळ्यामुळे रशियन महिला चिंतेत आहेत. त्यातच या दोन वर्षांत रशियन सैनिकांची शारीरिक आणि मानसिक स्थिती काय असेल? यासंदर्भात जगभरातल्या विश्वसनीय संघटनांकडून रशियन सैन्याबाबत फारच नकारात्मक बातम्या प्रसारित होत आहेत. रशियन सैनिकांच्या मृतदेहाचे मांजरी, कुत्रे, डुकरं लचके तोडत आहेत, असा व्हिडिओ समाजमाध्यमांवर काही महिन्यांपूर्वी प्रसारित झाला. स्वतःचा देश सोडून सैनिक युक्रेनमध्ये लढायला गेले. मात्र, त्याचा मृतदेह बेवारसपणे युक्रेनच्या रस्त्यावर पडला आणि त्याच्या मृतदेहाची अशी विटंबना झाली.