‘सारथी’ आणि ‘नेट’, ‘सेट’ परीक्षेचे मोफत प्रशिक्षण

ज्यातील मराठा, कुणबी, मराठा-कुणबी आणि कुणबी-मराठा समाजाच्या सामाजिक, शैक्षणिक व आर्थिक विकासासाठी २०१८ मध्ये छत्रपती शाहू महाराज संशोधन, प्रशिक्षण व मानव विकास संस्थेची (सारथी) स्थापना करण्यात आली. ‘शाहू विचारांना देऊया गती, साधूया सर्वांगीण प्रगती’ हे ब्रीद घेऊन काम करणार्‍या ‘सारथी’ संस्थेमार्फत विविध कल्याणकारी उपक्रम व योजना राबविण्याचे काम केले जाते.

महाविद्यालये आणि विद्यापीठांमध्ये साहाय्यक प्राध्यापक पदासाठी राज्य पात्रता परीक्षा अर्थात ‘सेट’ किंवा राष्ट्रीय पात्रता परीक्षा अर्थात ‘नेट’ परीक्षा उत्तीर्ण होणे अनिवार्य आहे. या परीक्षांमध्ये उत्तीर्ण होणार्‍या विद्यार्थ्यांचे प्रमाण अतिशय कमी आहे. ‘सेट’ किंवा ‘नेट’ परीक्षा उत्तीर्ण असलेल्या उमेदवारांना ‘पीएच.डी’ प्रवेश परीक्षेतून सूट देण्यात येते. या परीक्षांचे महत्त्व लक्षात घेऊन ‘सारथी’मार्फत राज्यातील मराठा, कुणबी, कुणबी-मराठा व मराठा-कुणबी या प्रवर्गातील लक्षित गटातील उमेदवारांना ‘सेट’, ‘नेट’ स्पर्धा परीक्षापूर्व निःशुल्क प्रशिक्षण देण्यात येत आहे.‘सेट’ स्पर्धा परीक्षापूर्व प्रशिक्षणासाठी दरवर्षी एक हजार उमेदवारांची निवड करण्यात येते, तसेच ‘नेट’ स्पर्धा परीक्षापूर्व प्रशिक्षणासाठीही दरवर्षी एक हजार उमेदवारांची निवड करण्यात येते. या प्रशिक्षणाचा कालावधी चार महिन्यांचा असून विद्यार्थ्यांना मोफत प्रशिक्षणासोबत दरमहा आठ हजार रुपये विद्यावेतन दिले जाते. विद्यार्थ्यांचे प्रशिक्षण शुल्क हे ‘सारथी’ संस्थेमार्फत पॅनेलवरील प्रशिक्षण संस्थेस अदा करण्यात येते. सद्यःस्थितीत पुणे, नागपूर व छत्रपती संभाजीनगर येथील ‘सारथी’ संस्थेच्या पॅनेलवरील प्रशिक्षण संस्थेमार्फत ‘सेट’ स्पर्धा परीक्षापूर्व प्रशिक्षण देण्यात येते.