‘झिम्मा २’च्या ताफ्यात रिंकू राजगुरू आणि शिवानी सुर्वे

सुपरहिट चित्रपट ‘झिम्मा’नंतर आता पुन्हा नव्या पोस्टरमधून आपल्या सगळ्या आवडत्या कलाकारांचा धम्माल लूक बघून प्रेक्षक मोठ्या पडद्यावर या सगळ्यांना भेटण्यास आतुर झाले आहेत. सुहास जोशी, क्षिती जोग, सुचित्रा बांदेकर, सिद्धार्थ चांदेकर, सायली संजीव आणि निर्मिती सावंत यांच्याबरोबरीने आणखी दोन प्रसिद्ध चेहरे या तगड्या कलाकारांच्या टोळीमध्ये सामील झाले आहेत. ते म्हणजे रिंकू राजगुरू आणि शिवानी सुर्वे. पण, या दोघींची पात्रं नेमकी काय आहेत आणि ती या कथेत काय रंग भरणार, यासाठी मात्र प्रेक्षकांना थोडी प्रतीक्षा करावी लागणार आहे.

बॉक्स ऑफिसवर यशस्वी छाप पाडत ‘झिम्मा’ने प्रेक्षकांच्या मनात घर तर केले आहे. त्याचबरोबर मायबाप प्रेक्षकांची मागणी बघता दिग्दर्शक हेमंत ढोमे यांना याच चित्रपटाचा ‘सिक्वेल’ आणण्यासही प्रवृत्त केले आहे. आज ‘झिम्मा २’साठी प्रेक्षकांची उत्सुकता बघता हेमंत ढोमे म्हणाले की, “पहिल्या भागाला लोकप्रियता मिळाली म्हणून दुसरा भाग करूया, असं कधीच ठरलं नव्हतं. पहिल्या भागाची कथा पुढे नेताना ‘रियुनियन’ची मजा सापडली आणि हा चित्रपट करायचं ठरलं. लोकांनी कथेवर, त्यातल्या पात्रांवर भरभरून प्रेम केलं. त्यामुळे या पात्रांना पुन्हा तितक्याच सहजतेने सादर करण्याची जबाबदारी होती. पण, माझ्या संपूर्ण टिमने ‘झिम्मा २’ मजा घेत आणि आपलेपणाने बनवला आहे. मला खात्री आहे आमचा हा आपलेपणा, साधेपणा प्रेक्षकांनाही आपलंसं करेल.”