ठाण्यात दसर्‍यानिमित्त रा.स्व.संघाचे पथ संचलन

राष्ट्रीय स्वयंसेवक संघ कल्याण जिल्ह्याच्यावतीने विजयादशमीनिमित्त कल्याण-डोंबिवली व टिटवाळा या भागात गणवेशातील स्वयंसेवकांची १३ संचलने काढली. शहरातील विविध ठिकाणी काढण्यात आलेल्या या संचलनात हजारो स्वयंसेवक सहभागी झाले होते. संचलनानंतर झालेल्या उत्सवात मान्यवरांनी स्वयंसेवकांना मार्गदर्शन केले. कल्याण पश्चिम भागातील प्रमुख उत्सवात बोलताना क्रीडा भारतीचे अखिल भारतीय महामंत्री राज चौधरी यांनी भारताला विश्वगुरू बनविण्यासाठी स्वयंसेवकांनी अधिकाधिक योगदान द्यावे, असे आवाहन केले. ते पुढे म्हणाले, “संघाच्या ९९ वर्षांच्या परिश्रमातून हजारो संस्था निर्माण झाल्या आहेत. सर्व समाजाला शाखेवर आणण्यासाठी अधिक परिश्रमांची आवश्यकता आहे. समाजातील अनेक घटक संघाजवळ येत आहेत. परंतु, अजून ते स्वतःला जाती बंधनात बांधून घेत आहेत. जातीभेद विसरून हिंदू म्हणून उभे राहावे,” असा आपला प्रयत्न असला पाहिजे.