हेच खरे स्वराज्यसैनिक!

दशकांपासून औद्योगिक क्षेत्रात आघाडीवर राहिलेल्या महाराष्ट्राची सर्वत्र चर्चा झाली आणि राज्याचा डंकाही वाजला. फडणवीसांनी त्यांच्या पाच वर्षांच्या काळात महाराष्ट्राला महान राज्य बनवण्याची पाऊलवाट बनवत राज्याला औद्योगिक पातळीवर पहिल्या क्रमांकावर पोहोचवलं आणि तोच अध्याय आताही सुरू झाला आहे. हजारो कोटींची गुंतवणूक महाराष्ट्रात आणतानाच राज्यातील युवकांना उच्चतम दर्जाचे कौशल्य प्रशिक्षण देत महाराष्ट्रातच काम देण्यासाठी रोजगार आणि कौशल्य विकास विभागाने कंबर कसून कामाला सुरुवात केली आहे. नुकताच राज्य सरकारने ‘इंडो कॅनेडियन चेंबर ऑफ कॉमर्स’ (आयसीसीसी) संस्थेसोबत करार केला असून युवकांना कौशक्यं प्रशिक्षण देण्यासोबतच महाराष्ट्र त्यांच्या हाताला रोजगार उपलब्ध करून देणे आणि परदेशाची दारंही त्यांच्यासाठी खुली करण्यासाठी सरकारने पुढाकार घेतला आहे. या करारानुसार, ‘आयसीसीसी’ आणि राज्य सरकार महाराष्ट्रातील औद्योगिक प्रशिक्षण संस्था म्हणजे ‘आयटीआय’च्या सक्षमीकरणासाठी प्रयत्न करणार आहे. राज्यातील ‘आयटीआय’ संस्थांकडे 15 वर्षांत कटाक्ष टाकायलाही आघाडी सरकारला वेळ मिळाला नव्हता. विद्यार्थ्यांना मिळणारे भत्तेही वेळेवर द्यायला आणि त्यांच्या अवस्थेत बदल करायला तत्कालीन विलासी सत्ताधीशांना वेळ मिळाला नाही. परंतु, विद्यमान सरकार आणि संबंधित विभागाचे मंत्री मंगलप्रभात लोढा यांनी यासाठी विशेष प्लॅन तयार केला आहे. नव्याने करण्यात आलेल्या या करारानुसार दुरवस्थेत असलेल्या ‘आयटीआय’ला नवा आकार देणे, युवकांना औद्योगिक जगताशी संबंधित आवश्यक ते कौशल्य प्रशिक्षण देणे, नव्याने उभारी घेत असलेल्या उद्योजकांना औद्योगिक जगतासोबत जोडून घेण्यासाठी प्रोत्साहन देणे, रोजगारासह औद्योगिकबाबतीत नवीन संधी निर्माण करणे आणि त्याचा लाभ ’अंत्योदय’चा मूलमंत्र वास्तवात जगत समाजातील उपेक्षितांपर्यंत पोहोचविणे ही उद्दिष्टे साध्य करण्यासाठी प्रयत्न केले जात आहेत. महाराष्ट्रातील युवकांना योग्य ते प्रशिक्षण देऊन परदेशातही रोजगाराच्या संधी मिळवून देण्याचे शिवधनुष्य सरकारने उचलले आहे. त्यामुळे औद्योगिक विकासासोबतच राज्यातील युवकांना पाठबळ देऊन महाराष्ट्राची वाटचाल ‘मॅग्नेटिक महाराष्ट्रा’कडे असल्याचे फडणवीस-शिंदेंनी अधोरेखित केले आहे.