भारतात हल्ल्याची योजना आखणार्‍या ‘इसिस’च्या दहशतवाद्यास रशियामध्ये अटक

 

 

नवी दिल्ली : ‘रशियन फेडरल सिक्युरिटी सर्व्हिस’ने (एफएसबी) सोमवारी ‘इसिस’ या दहशतवादी संघटनेच्या आत्मघाती बॉम्बरला ताब्यात घेतले. हा दहशतवादी भारतातील उच्चपदस्थ राजकीय नेत्यांविरोधात हल्ल्याचा कट रचत होता. रशियन वृत्तसंस्था ‘स्पुटनिक’ने याविषयी माहिती दिली आहे.

 

 

’एफएसबी’तर्फे देण्यात आलेल्या माहितीनुसार, ’एफएसबी’ने रशियामध्ये बंदी घातलेली आंतरराष्ट्रीय दहशतवादी संघटना ‘इस्लामिक स्टेट’चा सदस्य असलेल्या दहशतवाद्यास ताब्यात घेतले. हा दहशतवादी मध्य आशियातील एका देशातील मूळ रहिवासी आहे. भारतातील सत्ताधारी राजकीय नेत्यांपैकी एका नेत्यास उडवून देण्याची योजना हा आखत होता, असेही ‘एफएसबी’ने म्हटले आहे. निवेदनात पुढे म्हटले आहे की, ताब्यात घेतलेल्या दहशतवाद्याला ‘इसिस’च्या एका नेत्याने तुर्कीमध्ये आत्मघाती बॉम्बर म्हणून भरती केले होते.

 

 

दरम्यान, ‘इसिस’ आणि अन्य संबंधितांना दहशतवादी संघटना म्हणून अधिसूचित केले गेले आहे. ‘युएपीए’ कायद्याच्या पहिल्या अनुच्छेदामध्ये त्याविषयी नमूद करण्यात आले आहे. केंद्रीय गृह मंत्रालयाच्या म्हणण्यानुसार, ‘इसिस’ आपल्या विचारसरणीचा प्रचार करण्यासाठी विविध इंटरनेट-आधारित सोशल मीडिया प्लॅटफॉर्म वापरत आहे. या संदर्भात संबंधित यंत्रणांकडून ‘सायबर स्पेस’वर बारकाईने लक्ष ठेवले जात असून कायद्यानुसार कारवाई केली जात आहे.

 

 

 

पाकिस्तानसाठी हेरगिरी करणार्‍या एका व्यक्तीला दिल्लीतून अटक करण्यात आली आहे. हा गुप्तहेर हिंदू निर्वासित म्हणून भारतामध्ये राहत होता, भागचंद असे त्याचे नाव असून तो पाकसाठी हेरगिरी करीत असल्याचे सुरक्षा यंत्रणांच्या लक्षात येताच त्यास अटक करण्यात आली आहे. ‘राजस्थान इंटेलिजन्स’ने 46 वर्षीय भागचंदला दिल्लीतून अटक केली आहे. आरोपीने तीन वर्षांपूर्वी भारतीय नागरिकत्व घेतले होते आणि दिल्लीत राहून तो टॅक्सीचालक म्हणून काम करत होता. आरोपी पाकिस्तानी ‘हॅण्डलर’च्या संपर्कात असून दिल्लीतून महत्त्वाची माहिती पाकिस्तानला पाठवत असल्याची माहिती भारतीय गुप्तचरांना मिळाली होती.

 

 

याविषयी अधिक माहिती देताना ‘एडीजी इंटेलिजन्स’ उमेश मिश्रा म्हणाले की, भागचंद हा पाकिस्तानी ‘हॅण्डलर्स’च्या संपर्कात होते आणि दिल्लीतील संवेदनशील ठिकाणांची माहिती पाकिस्तानला पाठवत होता. भिलवाडा येथून दि. 14 ऑगस्ट रोजी अटक करण्यात आलेल्या नाराणलाल गद्री या व्यक्तीच्या चौकशीतून भागचंदविषयी माहिती उघड झाली होती.दरम्यान, आरोपी भागचंद 1998 मध्ये कुटुंबासह व्हिसावर भारतात आला होता. त्यास तीन वर्षांपूर्वी भारतीय नागरिकत्व मिळाले आहे. गुप्तचर विभागाचे संयुक्त पथक जयपूरमध्ये याची चौकशी करत आहे.