कधी करणार 'आरे ला का रे'? : आदित्य ठाकरेंवर 'आरे बचाओ'चे बुमरँग!

 

मुंबई(प्रतिनिधी): आरेतील प्रलंबित मेट्रो 3 कारशेड बांधकाम प्रकरणी पर्यावरण मंत्री आदित्य ठाकरे यांना पर्यावरण प्रेमींनी पुन्हा फटकारले आहे. आरेकडे जाणाऱ्या भिंतींवर अज्ञात व्यक्तींनी पर्यावरण मंत्री आदित्य ठाकरे यांच्या नावाने नाराजीकारक संदेश लिहिले आहेत.

'आदित्य क्या हुआ तेरा वादा' आणि 'आदित्य होश मे आओ' अशी हाक देत पर्यावरण मंत्री आदित्य ठाकरे यांनी याकडे लक्ष द्यावे, असे आवाहन पर्यावरणवाद्यांनी केले आहे. आरे मेट्रो ३ कारशेडच्या बांधकामावरून केंद्र आणि राज्य सरकारमध्ये जोरदार वाद सुरू झाला आहे. ही समस्या ज्या प्रकारे सोडवली जात नाही, त्याबद्दल पर्यावरणवाद्यांमध्ये असंतोष वाढत आहे. सत्तेत आल्यानंतर पर्यावरण मंत्री आदित्य ठाकरे यांनी अद्याप पर्यावरण कार्यकर्त्यांची भेट घेतलेली नाही.

वाढता रोष पाहता आदित्य ठाकरे यांनी पर्यावरणवाद्यांना भेटून आपली भूमिका जाहीर करावी, अशी मागणी गेल्या काही महिन्यांपासून दर रविवारी मेट्रो कारशेडवर जमणाऱ्या कार्यकर्त्यांकडून सातत्याने केली जात आहे. बुधवारी सकाळी आरेतील मरोळ मार्गावरील या भिंतीवर आदित्य ठाकरे यांच्या नावाने मेसेज लिहिल्याचेही दिसून आले. 'मेट्रो कारशेड गो बॅक', 'रहेगा आरे तबी बचेंगे सारे,' 'सेव्ह आरे,' 'आरे वाचवा,' 'जमीन रो रही है' असे संदेश भिंतीवर लिहिलेले होते. मात्र, यामागे नेमका कोणाचा हात आहे हे कळू शकलेले नाही.