नाशिकमधून जम्पिंग स्पायडरच्या नव्या प्रजातीचा शोध!

 

संपूर्ण जगात 'स्टेनेलुरीलस' या पोटजातीमध्ये जवळपास ५० प्रजातींची नोंद आहे. त्यामधील १८ प्रजाती भारतीय उपखंडामध्ये आढळून येतात. जीवशात्र अभ्यासक राजेश सानप आणि अनुराधा जोगळेकर यांना 'स्टेनेलुरीलस व्याघ्री' आणि 'स्टेनेलुरीलस मारुसिकी' या प्रजाती सर्वप्रथम महाराष्ट्रातील सिन्नर येथे आढळल्या. तसेच जीवशास्त्र अभ्यासक किरण मराठे आणि वेन मॅडिसन यांना स्टेनेलुरीलस श्वेतमुखी आणि स्टेनेलुरीलस ताम्रवर्णी या प्रजाती आंध्रप्रदेशातील कुप्पम येथे आढळून आल्या. बाह्यांग परीक्षण केल्यानंतर यातील तीनही प्रजाती नवीन असल्याचे सिद्ध झाले. जीवशात्रज्ञ राजेश सानप यांच्याबरोबर वेन मॅडिसन, किरण मराठे, जॉन कॅलेब, आणि अनुराधा जोगळेकर यांनीही या संशोधनात महत्वपूर्ण भूमिका बजावली आहे. या संदर्भातील संशोधन वृत्त 'झुटॅक्सा' या संशोधन पत्रिकेमध्ये ७ एप्रिल, २०२२ रोजी प्रकाशित झाले. आकाराने लहान असलेल्या या कोळ्यांचा अभ्यास अजूनही अपुराच आहे. जीवसंस्थेतील त्यांचे महत्वाचे स्थान लक्षात घेता या कोळ्यांचे संवर्धन करणे गरजेचे असल्याचे सानप यांनी सांगितले.