‘जी २०’ शिखर परिषदेस रशियाचे अध्यक्ष व्लादिमीर पुतीन सहभागी होणार

नवी दिल्ली: रशियाचे राष्ट्राध्यक्ष व्लादिमीर पुतिन सप्टेंबर २०२३ मध्ये नवी दिल्ली येथे होणाऱ्या जी २० शिखर परिषदेत सहभागी होण्याची शक्यता आहे, अशी माहिती रशियाच्या जी २० शेर्पा स्वेतलाना लुकाश यांनी दिली आहे.

भारताने १ डिसेंबर रोजी इंडोनेशियाकडून जी २० चे अध्यक्षपद स्वीकारले. रशियाचे राष्ट्राध्यक्ष पुतीन हे इंडोनेशियातील जी २० शिखर परिषदेस उपस्थित राहिले नव्हते. रशिया – युक्रेन संघर्षाची पार्श्वभूमी पुतीन यांच्या अनुपस्थितीस होती. मात्र, आता भारत – रशिया प्रगाढ संबंधांच्या पार्श्वभूमीवर भारतात होणाऱ्या शिखर परिषदेस पुतीन उपस्थित राहण्याची शक्यता आहे.

त्याविषयी बोलताना रशियन शेर्पा स्वेतलाना लुकाश म्हणाल्या, भारतामध्ये आयोजित होणाऱ्या जी २० परिषदेच्या प्रत्येक कार्यक्रमास रशियन प्रतिनिधी उपस्थित राहणार आहेत. आपली भूमिका स्पष्ट करणे, विचार मांडणे आणि इतर भागिदार देशांच्या भूमिका जाणून घेणे रशियासाठी गरजेचे आवश्यक असून त्यासाठी रशियाचा पूर्ण सहभाग असणार आहे. त्याचप्रमाणे सप्टेंबर महिन्यात होणाऱ्या शिखर परिषदेस रशियाचे राष्ट्राध्यक्ष व्लादिमीर पुतीनदेखील सहभागी होण्याची दाट शक्यता असल्याचेही लुकाश यांनी सांगितले. रशियातील टिएएसएस वृत्तसंस्थेशी संवाद साधताना त्या बोलत होत्या.

उदयपूर येथे झालेल्या जी २० शेर्पा बैठकीदरम्यान, रशियन शेर्पा स्वेतलाना लुकाश यांनी भारत आणि भारतीय शेर्पा अमिताभ कांत यांचे 'महिला-नेतृत्व विकास' या गटाच्या प्रमुख प्राधान्यक्रमांपैकी ठेवल्याचे विशेष कौतुक केले होते.