भारतमाता युवा प्रतिष्ठान

भारतमाता युवा प्रतिष्ठानची यशस्वी वाटचाल करताना कार्यकर्त्यांचे प्रचंड परिश्रम, कर्तव्यभावना आणि नि:स्वार्थ सेवा स्वाभाविकच आहे. पण त्याचबरोबर गावातील, परिसरातील थोरा-मोठ्यांचे आशीर्वाद तसेच संत, सज्जन नागरिक यांचे तन-मन-धनपूर्वक योगदान असल्यामुळे ही वाटचाल अधिकच यशस्वी होत आहे आणि म्हणून ‘भारतमाता युवा प्रतिष्ठान’ने छत्रपती श्री शिवरायांचे सदैव स्मरण व्हावे, याकरिता ‘श्री शिवस्फूर्ती प्रेरणा केंद्र’ व कार्यालयाच्या निर्माणाचे कार्य आपल्या सर्वांच्या सहकार्याने हाती घेतले आहे.याच सोबत ६०० चौरस फुटांचे सभागृह (कार्यालय) ही निर्माण करीत आहोत. या सभागृहाचा सदुपयोग विद्यार्थी अभ्यासिका, वाचनालय, प्रबोधन वर्ग, कार्यकर्ता प्रशिक्षण वर्ग व बैठक तसेच ग्रामीण भागातील शिक्षणासाठी येणार्‍या गरीब, गरजू विद्यार्थ्यांची निवास व्यवस्था करण्याचा उद्देश आहे. देव, देश, धर्म यामुळे हे केंद्र राष्ट्रनिर्माणाचे अधिष्ठान ठरते. हे ईश्वरी कार्य हाती घेताना ‘श्री शिवस्फूर्ती प्रेरणा केंद्र’ सामाजिक जागरणाच्या दृष्टीने सर्वांनाच दिशादर्शक ठरेल. प्रतिष्ठानच्या कार्यकर्त्यांनी सामाजिक जाणिवेतून व कर्तव्यभावनेतून दोन्ही प्रकल्प हाती घेतले आहेत. या सेवायज्ञात समाजातील सज्ज्नशक्तीने निरपेक्ष सेवेच्या समिधा तन-मन-धनपूर्वक अर्पण कराव्यात ही विनंती! गेल्या ३१ वर्षांपासून प्रतिष्ठान आदर्श माघी सार्वजनिक श्री गणेशोत्सव कार्यक्रम -उपक्रमांतून संघटन, कीर्तन-प्रवचनातून समाज प्रबोधन, समाज जागरणाचे कार्य सुरू आहे.

छत्रपती शिवराय महाराष्ट्राचे शक्तिस्थान,श्रद्धास्थान. प्रतिष्ठानने छत्रपतींचे मंदिर स्थापन केले. छत्रपतींच्या शौर्याची आणि त्यागाची प्रेरणा समाजात सर्वत्र चेतवावी हा प्रतिष्ठानचा ध्यास आहे.मागील सहा वर्षांपासून तीन दिवसीय मातृ महोत्सवात आध्यात्मिक, सांस्कृतिक कार्यक्रम तसेच समाजातील विविध क्षेत्रातील कर्तृत्त्ववान व गुणिजनांचा सन्मान मंडळाच्या ७५ सदस्यांनी ‘माधव नेत्रपिढी’करिता नेत्रदानाचा संकल्प केला आहे. दरवर्षी आरोग्य व रक्तदान शिबिराचे आयोजन होत असते.


गरीब व गरजू होतकरू विद्यार्थ्यांना शैक्षणिक साहाय्यता.