हॅरी पॉटरने मला खूप काही दिलं....

आज हॅरी पॉटरला २० वर्ष झाली.. त्या निमित्ताने आठवणींचा हा एक छोटासा प्रवास..

लॅपटॉप ऑन केला आणि नकळत कर्सर हॅरी पॉटरच्या फोल्डर कडे गेला. सिनेमा सुरु झाला आणि मी भानावर आले.

हॅरी पॉटर म्हणजे माझं बालपण.. हॅरी पॉटर म्हणजे माझी जादुई दुनिया.. हॅरी पॉटर म्हणजे मैत्री, हॅरी पॉटर म्हणजे प्रेम, नकळत अनेक गोष्टी शिकवणारा हॅरी पॉटर माझ्या खूप खूप जवळचा आहे.

हॅरी पॉटरचे वेड मला लागले ते साधारण १०-१५ वर्षापूर्वी, ते ही माझ्या मोठ्या भावामुळे. दादा जे करेल ते मला करायला फार आवडायचं. त्याच्याकडे इंग्रजी हैरी पॉटर ची पुस्तकं होती, मी बाबांच्या मागे लागून अनुवादित घेतली. आणि मी कधी या जगात हरवून गेले माझे मलाच कळले नाही. हॅरीनं मला एक नवीन जग दिलं. एकदा का हातात हॅरीचं पुस्तक आलं की ते काही परत हातातून सुटायचं नाही. दादा आणि माझ्यात स्पर्धा असायची कोण आधी जिंकणार आणि त्यातच आपण आधी वाचलं तर मुद्दाम दादाला सगळा सस्पेंस सांगायचा आणि तेच त्याने केलं तर मात्र माझा पार मूड जायचा.

मी पहिल्यांदा हॅरी पॉटर वाचलं तेंव्हा मला सगळ्यात जास्त भावलेली गेष्ट म्हणजे " वोल्डेमॉर्टच्या अक्षम्य शापापासून हॅरी वाचला ते केवळ त्याच्या आईने त्याला दिलेल्या प्रेमाच्या शक्तिमुळे." आजच्या एकल कुटुंब पद्धती आणि मटेरिअलिस्टिक जगामध्ये आपल्या लोकांचे, नातेसंबंधांचे, मैत्रीचे महत्व जे.के. रोलिंग नामक एका विदेशी स्त्रीने किती वेगळ्या पद्धतीने समजावले याचे कौतुक आहे. हॅरी पॉटरचा नवीन भाग आल्या आल्या युनिवर्सल लायब्ररी अॅण्ड बुक स्टोरमधून तो विकत आणायचा आणि हावरटासारखा वाचायचा याची मजाच वेगळी होती. अजूनही मी हैरी पॉटर कुठुनही कधीही वाचू शकते. कदाचित त्याच प्रेमामुळे प्रत्येक वेळा हॅरी पॉटर वाचताना एखाद्या नवीनच गोष्टीची वेगळ्याने ओळख होते.

नंतर या पुस्तकांवर आधारित आठ भागांमध्ये सिनेमे आले. मी प्रत्येक भाग अगदी न चुकता थिएटरमध्ये जावून बघितला आहे. पाय फ्रॅक्चर असताना सुद्धा. हे वेड केवळ या सिनेमांमधील जादुई दुनिया, वेगवेगळे इफेक्ट्स किंवा भरपूर जगमगाटामुळे नाही तर या सिनेमा आणि पुस्तकांच्या मागे असलेल्या संकल्पनेमुळे लागतं. यामधील हॅरीची हिंमत, हरमाईनीचा आत्मविश्वास, साहस आणि ज्ञान, रॉनची मैत्री निभवण्याची तयारी आणि हैरी वर प्रेम करणाऱ्या प्रत्येक व्यक्तीत असलेली समर्पणाची भावना खूप काही शिकवून जाते. आपल्या माणसांची साथ असेल तर जगातील कुठल्याही संकटाला तोंड देऊन अजिंक्य विजय मिळवता येऊ शकतो हे हैरी पॉटरच्या प्रत्येक भागाने शिकवले आहे.

आपल्या प्रत्येकामध्येच एक उजळ बाजू असते आणि एक काळी बाजू. आपण नेहमीच ती उजळ बाजू जगासमोर आणायचा प्रयत्न करत असतो. मात्र काळ्या बाजूला नाकारता येत नाही. आणि ती काळी बाजू असणं म्हणजे काहीच गैर नाही. हेच या पुस्तकांमधून आणि चित्रपटांमधून पण दिसून येतं. हॅरीमध्ये काही अंशात या सिनेमातील मुख्य खलनायक वोल्डेमॉर्टचा भागही असतो. जादूच्या शक्तीमुळे ते दोघेही एकमेकांशी जोडले जातात. हॅरी ते अॅक्सेप्ट करतो, आणि त्यावर कशी मात करता येईल याकडे लक्ष केंद्रित करतो. आपणही आपल्या रोजच्या आयुष्यात स्वत:ची काळी बाजू 'अॅक्सेप्ट' करणं शिकलो तर कित्ती प्रश्न सुटतील नाही..