#एक धागा सुखाचा- लिननच्या साड्या

सध्या लिननच्या साड्या खूप लोकप्रिय आहेत. लिननचा धागा वापरून विणलेल्या साड्या पॉप्युलर करायचं श्रेय आनाविला मिश्रा नावाच्या डिझायनरला जातं. आजकाल कुठल्याही वर्तमानपत्राचं पेज थ्री पान उघडलं तर कोणती ना कोणती सेलेब्रीटी बाई आनाविलाच्या लिनन साड्या नेसून मिरवताना दिसेल. पण हे लिनन प्रकरण आहे तरी काय?

लिनन म्हणजे तागाच्या झाडाच्या खोडापासून बनवलेला धागा. हा धागा वापरून विणलेलं कापड हे सुती कापडापेक्षा वजनाला जड आणि जास्त चमकदार असतं. लिननचा धागा कापसाच्या धाग्याच्या मानाने जास्त चिवट आणि तुटायला कठीण असतो. लिननचे कपडे वापरायला खूप सुटसुटीत आणि हवेशीर असतात. डाय न केलेल्या नैसर्गिक लिननच्या धाग्याचा रंग पिवळसर किंवा राखाडी असतो.

सुती कापडाच्या मानाने लिननच्या धाग्यावर रंग चढवायला जरा जास्त वेळ आणि मेहनत लागते त्यामुळे लिनन सुती धाग्यापेक्षा महाग पडतं, पण कापसापेक्षा तागाच्या लागवडीला त्यामानाने खूप कमी पाणी, खत व निगराणी लागते. भारतामध्ये तागाची लागवड उत्तर प्रदेश, बिहार आणि आंध्र प्रदेश मध्ये होते. भारतातल्या प्रखर उन्हाळ्यासाठी लिनन हा खरोखरच चांगला पर्याय आहे, पण लिनन फार पटकन चुरगळतं, आणि सुती कापडाच्या तुलनेत बरंच महागही पडतं.

साडी विणताना वापरलेल्या लिननच्या धाग्याचा काऊन्ट किती आहे त्यावर साडीची डेन्सीटी आणि किंमत अवलंबून असते. साधारण तीन हजारापासून पुढे लिननच्या साड्या बाजारात मिळतात. पण कमी काऊन्ट असलेल्या साड्यांची वीण फार सैल असते, त्यामुळे त्या साड्या जरा जपूनच वापराव्या लागतात, कशालाही अडकल्या तर साड्या फाटण्याची शक्यता खूप असते. लिननच्या साड्या नेसताना शक्यतो निरीला सेफ्टी पिन वापरू नये.

पेस्टल शेड मध्ये हल्ली खूप सुंदर लिननच्या साड्या मिळतात. उन्हाळ्यात अश्या साड्या नेसायला खरोखरच कूल वाटतात. लिननची ही लोकप्रियता आजची नाहीये. पुरातन इजिप्तमध्ये माणूस मेल्यावर त्याची ममी बनवताना वर गुंडाळायला लिननचे तलम धागेच वापरत असत. आजकाल भारतात प्युअर लिनन बरोबरच सिल्क आणि लिनन किंवा सुती आणि लिनन अश्या मिश्र धाग्यांपासून विणलेल्या साड्याही मिळतात. सौम्य रंगातल्या लिननच्या साडीवर बोट नेकचा कोपरापर्यंतच्या बाह्यांचा ब्लाउज आणि गळ्यात एखादाच पण ठळक दागिना हे कोंबीनेशन कुणालाही खुलून दिसतं. लिननची साडी ड्रेप होतेही फार छान!