अल्लू अर्जुननंतर राम चरणच्या चित्रपटाला गालबोट; दोन चाहत्यांचं झालं निधन

 

 

 

मुंबई : अभिनेता अल्लू अर्जूनच्या 'पुष्पा २' चित्रपटाने २०२४ हे वर्ष विशेष गाजवलं. एकीकडे बॉक्स ऑफिसवर तुफान कमाई करणाऱ्या या चित्रपटाला एका महिलेच्या मृत्यूमुळे गालबोट देखील लागलं होतं. आता असाच प्रकार अभिनेता रामचरण याच्या आगामी 'गेम चेंजर' या चित्रपटाबाबत घडलं आहे. राम चरणच्या ‘गेम चेंजर’ चित्रपटाच्या एका इव्हेंटनंतर अशीच दुर्दैवी घटना घडली, ज्यात दोन जणांचा मृत्यू झाला आहे.

 

राम चरणचा आगामी चित्रपट ‘गेम चेंजर’ सध्या चांगलाच चर्चेत आहे. या चित्रपटाच्या प्रदर्शनाला फार कमी कालावधी बाकी असल्यामुळे जोरदार प्रमोशन सुरु आहे. मात्र, याचदरम्यान एक दु:खद बातमी समोर आली आहे. नुकताच या चित्रपटाचा प्री-रिलीज इव्हेंट आयोजित करण्यात आला होता आणि कार्यक्रमानंतर मोठा अपघात झाला असून कार्यक्रमाला आलेल्या दोन चाहत्यांचा मृत्यू झाला.

 

‘गेम चेंजर’चा प्री-रिलीझ इव्हेंट ४ जानेवारी रोजी राजमुंद्री येथे संपन्न झाला. या इव्हेंटला आलेले काकीनाडा जिल्ह्यातील अरवा मणिकंथा (२३) आणि ठोकडा चरण (२२) हे दोघे दुचाकीवरून जात होते. रात्री साडेनऊच्या सुमारास वाडीसालेरूजवळ व्हॅनने त्यांच्या दुचाकीला धडक दिली. त्यानंतर जखमींना पेद्दापुरम रुगणालयात दाखल करण्यात आलं होतं पण दुर्देवाने दोघांचा ही मृत्यू झाला.

 

दरम्यान, या घटनेवर चित्रपटाचे निर्माते दिल राजू यांनी शोक व्यक्त केला असून त्यांनी म्हटले आहे की, “मला समजलं की कार्यक्रमानंतर, घरी परत जाताना, दोन जणांचं दुःखद निधन झाले. पवन कल्याण या कार्यक्रमाला यायला तयार नव्हते, पण, राम चरण आणि मी आग्रह करून त्यांना कार्यक्रमाला बोलावलं होतं. मृतांच्या आत्म्याला शांती लाभो. आम्ही दोन्ही कुटुंबांच्या पाठीशी उभे राहू आणि त्यांना मदत करू. मी दोघांच्याही कुटुंबाला प्रत्येकी ५ लाख रुपये मदत पाठवत आहे,” असं दिल राजू म्हणाले. तर, उपमुख्यमंत्री पवन कल्याण यांनीही प्रत्येकाच्या कुटुंबाला ५ लाख रुपयांची आर्थिक मदत केली आहे.

 

राम चरण आणि आंध्रप्रदेशचे उपमुख्यमंत्री पवन कल्याण यांनी हजेरी लावलेल्या या कार्यक्रमात मोठ्या प्रमाणावर चाहते आले होते. कार्यक्रमाच्या ठिकाणी मोठी गर्दी झाली होती. ‘गेम चेंजर’ या चित्रपटात राम चरण कियारा अडवाणी आणि एसजे सूर्या यांच्यासह जयाराम, नासर, अंजली हे कलाकार आहेत. हा चित्रपट १० जानेवारी रोजी प्रदर्शित होणार आहे.