दावोसमध्ये महाराष्ट्राचा विक्रम! पहिल्याच दिवशी ६,२५,४५७ कोटींचे करार

 

 

दावोस : दावोस येथील वर्ल्ड इकोनॉमिक फोरममध्ये पहिल्याच दिवशी महाराष्ट्राने विक्रम केला आहे. मुख्यमंत्री देवेंद्र फडणवीस यांच्या उपस्थितीत तब्बल ६,२५,४५७ कोटी रुपयांचे गुंतवणूक करार करण्यात आले.

 

मंगळवार, २२ जानेवारी रोजी मुख्यमंत्री देवेंद्र फडणवीस यांनी सामंजस्य करारांच्या व्यतिरिक्त अनेक कंपन्यांच्या प्रमुखांच्या भेटी घेतल्या. तसेच त्यांना महाराष्ट्रात गुंतवणुकीसाठी निमंत्रित केले. टाटा समूहाचे अध्यक्ष एन. चंद्रशेखरन यांचीही मुख्यमंत्र्यांनी भेट घेतली. दरम्यान, टाटा समूह ३० हजार कोटींची गुंतवणूक करणार आहे.

 

मुख्यमंत्री देवेंद्र फडणवीस यांनी काल्सबर्ग समूहाचे सीईओ जेकब अरुप अँडरसन यांची भेट घेतली. काल्सबर्ग समूहाने महाराष्ट्रात गुंतवणुकीची इच्छा व्यक्त केली असून मुख्यमंत्र्यांनी त्यांना संपूर्ण सहकार्य करण्याचे आश्वासन दिले. रिटेल क्षेत्रात कार्यरत लुलू समूहाचे प्रबंध संचालक एमए युसुफ अली यांचीही देवेंद्र फडणवीस यांनी भेट घेतली. त्यांनी नागपुरात गुंतवणूक करण्याची इच्छा प्रदर्शित करत महाराष्ट्रातही विस्तार करण्याची तयारी दर्शविली आहे.

 

यासोबतच रिन्यू पॉवरचे अध्यक्ष आणि सीईओ सुमंत सिन्हा यांची देवेंद्र फडणवीस यांनी भेट घेतली. बीड जिल्ह्यात १५ हजार मेवॉ पाईपलाईन आणि पवनऊर्जा प्रकल्पाबाबत यावेळी चर्चा झाली. शिंडर इलेक्ट्रीक इंडियाचे प्रबंध संचालक आणि सीईओ दीपक शर्मा यांचीही त्यांनी भेट घेतली. जागतिक बँकेच्या मदतीने राज्यातील आयटीआयच्या सक्षमीकरण कार्यक्रमात तसेच ऊर्जा क्षेत्रात एआयच्या वापराबाबत सहकार्य करण्याबाबत यावेळी चर्चा झाली. अहिल्यानगर आणि नाशिक येथे विस्तार करण्याच्या त्यांच्या योजनांचेही सूतोवाच त्यांनी केले.

 

मास्टरकार्ड, एपीएसीचे अध्यक्ष लाईंग हाई यांचीही मुख्यमंत्र्यांनी भेट घेतली. लुईस ड्रेफसचे सीईओ मायकेल ग्लेंची यांच्याशी शेती, अन्नप्रक्रिया, आंतरराष्ट्रीय शिपिंग आणि वित्तीय क्षेत्राबाबत त्यांनी चर्चा केली. शेतीच्या क्षेत्रात अधिक सहकार्य वाढविण्यावर यावेळी चर्चा करण्यात आली. तसेच मुख्यमंत्री देवेंद्र फडणवीस यांनी कॉग्निझंटचे सीईओ रविकुमार एस. यांचीदेखील भेट घेतली. दरम्यान, दुसऱ्या दिवशीही दावोसमध्ये महाराष्ट्रासाठी मोठ्या प्रमाणात गुंतवणूक करार होणार आहेत.