कोलकात्यात आर. जी. कार प्रकरणाची पुनरावृत्ती; वॉर्ड बॉय अटकेत
Total Views |
कोलकाता : (Kolkata) कोलकात्यातील आर. जी. कार वैद्यकीय रुग्णालयामध्ये प्रशिक्षणार्थी महिला डॉक्टरच्या बलात्कार आणि हत्येवरुन सुरू असलेला गदारोळ अजूनही थांबलेला नाही. त्यातच कोलकाता येथील आणखी एका रुग्णालयात महिलेचा विनयभंग झाल्याची घटना समोर आली आहे. याप्रकरणी कोलकाता पोलिसांनी एका तरुणाला अटक केली आहे. पोलिसांकडून मिळालेल्या माहितीनुसार, २६ वर्षीय पीडित महिलेच्या मुलावर कोलकाता येथील रुग्णालयात उपचार सुरू होते. रात्री आई मुलाजवळ झोपली होती. यावेळी, रुग्णालयाच्या वॉर्डबॉयने महिला झोपेत असताना तिचा विनयभंग केला आणि मोबाईलमधून व्हिडिओही बनवला. महिलेच्या तक्रारीवरून पोलिसांनी तरुणाला अटक केली आहे.
कोलकात्याच्या ‘इन्स्टिट्यूट ऑफ चाइल्ड हेल्थ’मध्ये शनिवार, दि. १४ सप्टेंबर रोजी रात्री ही घटना घडली असून महिलेने रविवार, दि. १५ सप्टेंबर रोजी पोलीस ठाण्यात तक्रार दिली. तक्रारीवरुन पोलिसांनी गुन्हा दाखल केला आणि वॉर्डबॉयला अटक केली. महिलेने आरोपीवर चुकीच्या पद्धतीने स्पर्श करणे आणि व्हिडिओ शूट केल्याचा आरोप केला आहे. दरम्यान, बंगाल भाजपचे केंद्रीय सहप्रभारी अमित मालवीय यांनी या घटनेबाबत ममता बॅनर्जी यांच्या सरकारवर निशाणा साधला. पश्चिम बंगालमध्ये चालणारी सरकारी रुग्णालये महिलांसाठी असुरक्षित असल्याचे त्यांनी म्हटले आहे.
