ठामपाच्या प्रसूतिगृहाला अवकळा

 

 

ठाणे, दि.११ : प्रतिनिधी : बाळकुम परिसरासह काल्हेरपर्यंत हजारो महिलांना आधार ठरलेल्या ठाणे महापालिकेच्या प्रसूतिगृहाला अवकळा आली आहे. यासाठी सूचवण्यात आलेली पर्यायी जागा देखील एका संस्थेला देण्यात आल्याने पालिका अधिकाऱ्यांच्या ढिसाळ कारभाराचा आणि दिरंगाईचा निषेध आ. संजय केळकर यांनी केला आहे.

 

ठाणे महापालिकेचे बाळकुम पाडा-१ मध्ये तळ अधिक एक मजली प्रसूतिगृह असून ते सुमारे ३५ वर्षे जुने आहे. येथे १० रुग्णशय्या असून बाळकुम, ढोकाळी, कोलशेत, माजिवडा, मनोरमा नगर, मानपाडा, आझाद नगर आदी भागांतील शेकडो महिलांना या प्रसूतिगृहाचा लाभ होत होता. मात्र, गेल्या काही वर्षांपासून या वास्तूस अवकळा आली असून, स्लॅब कोसळणे, पाणी गळती, अशा अनेक समस्या भेडसावत आहेत. त्याचा फटका गर्भवती महिलांना बसत आहे. याबाबत नागरिकांच्या अनेक तक्रारी पुढे येत होत्या.

 

आ. संजय केळकर यांनी या वास्तूची पाहणी करून संबंधित अधिकाऱ्यांना दुरुस्तीबाबत वेळोवेळी सूचना केल्या होत्या. गेल्या तीन वर्षांपासून आ. केळकर हे याबाबत पाठपुरावा करत असल्याने दुरुस्तीसाठीचा निधी देखील वर्ग करण्यात आला होता. मात्र अधिकाऱ्यांची अक्षम्य दिरंगाई आणि ढिसाळ कारभार यामुळे या वास्तूची देखभाल दुरुस्ती होऊ शकली नाही. परिणामी, ती धोकादायक झाली आहे. सद्य स्थितीत ही वास्तू बंद ठेवण्यात आल्याने शेकडो महिलांची गैरसोय होत आहे. आ. संजय केळकर यांनी नुकतीच या प्रसूतिगृहाची पाहणी केली आणि संबंधित अधिकाऱ्यांच्या बेजबाबदारपणाबाबत संताप व्यक्त केला. हे प्रसूतिगृह तातडीने मुल्लर हॉल येथे हंगामी तत्त्वावर स्थलांतरित करण्याची मागणी आ. केळकर यांनी केली.

 

यावेळी भाजपचे स्थानिक पदाधिकारी तन्मय भोईर, निलेश पाटील, रविराज रेड्डी, सचिन शिनगारे, राकेश जैन, मयूर भोईर आणि स्थानिक नागरिक मोठ्या संख्येने उपस्थित होते.

 

 

"गेल्या तीन वर्षांपासून याबाबत पाठपुरावा करत आहे. हे प्रसूतिगृह नव्याने भव्य स्वरूपात उभारण्यासाठी बाळकुम ऑक्ट्रॉय नाका येथे पर्यायी जागाही सूचवली होती. मात्र अधिकाऱ्यांनी नवीन प्रसूतिगृहाला प्राधान्य न देता एका संस्थेला ती जागा दिली. हा निर्णय अधिकाऱ्यांनी कोणाच्या दबावाखाली घेतला?" असा प्रश्न उपस्थित करत आ. संजय केळकर यांनी संताप व्यक्त केला.