फ्रान्समध्ये ‘अनुभवा’चे शिक्षण देणारा महाराष्ट्राचा माणूस

प्रसाद तसे मूळचे छत्रपती संभाजीनगरचे. वडील राष्ट्रीय हॉकीपटू. साहजिकच प्रसादनेही हॉकी खेळावे असा आग्रह. पण, प्रसादची ओढ क्रिकेटकडे. शेवटी क्रिकेटसाठी घरातून पुणे गाठले. अगदी ‘रणजी लेव्हल’ गाठण्यापर्यंतच्या दर्जाचे क्रिकेट खेळले. पुढे पुणे विद्यापीठातून वाणिज्य शाखेतून पदवीही घेतली आणि वयाच्या २१व्या वर्षी त्यांना शिक्षणासाठी फ्रान्सची संधी मिळाली. तिथे फ्रेंच भाषेच्या अत्यंत अवघड अशा परीक्षेत विशेष प्रावीण्य मिळवल्यानंतर त्यांना एका फ्रेंच कंपनीकडून भागीदारीची ऑफर मिळाली. भारत आणि फ्रेंचमधील उद्योगांसाठी विविध संधी शोधणे, समस्यांवर मार्ग काढणे आणि उपलब्ध संसाधने त्यांना माफक दरात उपलब्ध करून देणे, असे त्यांचे कामाचे स्वरुप. या कंपनीचे काम करीत असताना त्यांच्या लक्षात आले की, आपल्या शिक्षणपद्धतीत पुस्तकी शिक्षण घेतल्यानंतर त्या विद्यार्थ्याला या कठोर जगात आपले नशीब आजमावण्यासाठी ढकलले जाते. गाठीशी अनुभव नसल्यामुळे अनेक कळ्या उमलण्याआधीच कोमेजून जातात. गुणवत्तेचा हा र्‍हास थांबविण्यासाठी या विद्यार्थ्यांना जर शिक्षण घेता घेताच आवश्यक तो अनुभव देण्याची व्यवस्था केली, तर असा विचार त्यांनी केला आणि त्यातूनच जन्म झाला ‘ईटीईसी’ या इन्स्टिट्यूटचा.

अनुभवाला केंद्रस्थानी मानून उद्योगजगतासाठी येथे विद्यार्थी घडविले जातात. गेली २३ वर्षे प्रसाद देशपांडे फ्रान्समध्ये आहेत. आता शिक्षणाचा नवा मंत्र तेथे यशस्वीपणे राबवत आहेत. याशिवाय भारतातील विविध उद्योग संस्थांना फ्रान्समध्ये आणि फ्रान्समधील विविध संस्थांना भारतात समन्वय साधून देण्याचे कामही त्यांची कंपनी करते. पॅरिसमध्ये ‘ला देफाँस’ नावाचे उच्चभ्रू उद्योग क्षेत्र आहे. तेथे ‘ग्रांदे आर्च’ नावाची भव्य वास्तू आहे. पॅरिस राज्यक्रांतीच्या २०० वर्षांच्या निमित्ताने ही वास्तू देशाला अर्पण करण्यात आली होती. या वास्तूतील अतिभव्य दालनात प्रसाद यांनी ‘इंडो-फ्रान्स वाईन फेस्टिव्ह’ यशस्वी करून दाखविला होती. महाराष्ट्रातील वाईनला जागतिक व्यासपीठ मिळवून देण्यात या ‘वाईन फेस्टिव्ह’चाच मोठा वाटा होता, असे प्रसादजी म्हणतात. महाराष्ट्राचे तत्कालीन मुख्यमंत्री विलासराव देशमुख यांनी त्यासाठी विशेष पुढाकार घेतला होता. जगाला क्वालिटी काम आणि क्वालिटी वेळेत करून हवेय. वेळ आणि गुणवत्तेची सांगड घालतानाच नफ्याची बाजू कशी वरचढ राहील, याचा मूलमंत्र या ‘ईटीईसी’मध्ये दिला जातो.

संदीप चव्हाण