राजकीय अस्थिरतेच्या बुरख्याखाली हिंदूंविरोधात जिहाद

नवी दिल्ली : (पार्थ कपोले) बांगलादेशात एका बाजुला राजकीय अस्थिरता आणि शेख हसीना आंदोलन सुरू आहे. त्याचवेळी दुसरीकडे देशातील हिंदूंना लक्ष्य करून त्यांच्याविरोधात नियोजनबद्ध जिहाद पुकारण्यात आला आहे.

 

बांगलादेशात सरकारी नोकरीतील कोटा अर्थात आरक्षणाच्या विरोधात आंदोलन सुरू झाले होते. आंदोलनामध्ये एकीकडे विद्यार्थी शेख हसीना आणि त्यांच्या अवामी लीगला लक्ष्य करत होते. त्याचवेळी दुसरीकडे जमात-ए-इस्लामी, हेफाजत-ए-इस्लाम आणि जमात शिबीरसह इस्लामी गटांनी हिंदू समुदायांवर व्यापक हल्ले सुरू करण्यासाठी विद्यार्थ्यांचा आंदोलनाचा आणि त्यामुळे निर्माण झालेल्या अराजकाचा वापर केला. मंदिरांची विटंबना आणि हिंदू घरे आणि व्यवसायांना लक्ष्य करणे यासह देशभरातील असंख्य हिंसक घटना पाहता कट्टरतावाद्यांनी हिंदूंविरोधात जिहाद पुकारण्याची पूर्ण तयारी केली होती, असे दिसून येते.

हिंदूंवरील हल्ल्यांचा भौगोलिक प्रसार संकटाच्या व्यापक स्वरूपावर प्रकाश टाकतो. ढाका आणि चितगाव सारख्या शहरी भाग आणि लक्ष्मीपूर, मदारीपूर आणि सीताकुंडा सारख्या ग्रामीण भागांसह विविध ठिकाणी घटनांची नोंद झाली आहे. हा प्रसार सूचित करतो की हिंसा एका क्षेत्रापुरती मर्यादित नाही, तर ती देशव्यापी असून त्यामध्ये विविध क्षेत्रांतील आणि सामाजिक स्तरांतील हिंदूंवर प्रभाव पडला आहे. हे हल्ले दाट लोकवस्तीच्या शहरी भागात आणि विरळ लोकवस्तीच्या ग्रामीण भागात झाले आहेत. ही वस्तुस्थिती देशभरातील हिंदू समुदायाची असुरक्षितता अधोरेखित करते. अनेक ठिकाणी एकाच वेळी होणाऱ्या हल्ल्यांचे समन्वित स्वरूप हिंदू लोकसंख्येला जेथे जेथे सापडतील, तेथे तेथे त्यांना लक्ष्य करण्याचा संघटित प्रयत्न सूचित करते. अशाप्रकारे एकाचवेळी हल्ले केल्याने हिंदूंना आपला जीव वाचविण्याची संधीच मिळू नये, असे नियोजन करण्यात आल्याचे स्पष्ट होते.

‘सीआयएचएस’च्या अहवालामध्ये १४ जून ते ६ ऑगस्ट या कालावधीत झालेल्या हिंदू अत्याचाराची आकडेवारी देण्यात आली आहे. त्यामध्ये प्रातिनिधिक स्वरूपात ५७ घटनांचा समावेश करण्यात आला आहे. त्यामध्ये, अल्पवीयन हिंदू मुलींवर बलात्कार, ढाक्यात हिंदू व्यावसायिक कुटुंबांवर हल्ले, हिंदू पत्रकार, संपादक आणि वृत्तपत्रांच्या कार्यालयांवर हल्ले, अवामी लीगच्या हिंदू नेत्यांवर आणि समर्थकांवर हल्ले, प्रामुख्याने इस्कॉनसह अन्य मंदिरांवर हल्ले आदी प्रकार नोंदविण्यात आले आहेत. हे हल्ले यादृच्छिक हिंसाचाराचे नव्हते तर ते बांगलादेशातून हिंदू संस्कृती आणि धर्माचे उच्चाटन करण्याच्या व्यापक धोरणाचा भाग असल्याचे दिसते. धार्मिक मूर्तींचा पद्धतशीरपणे नाश आणि मंदिरांची तोडफोड हे हिंदू धार्मिक प्रथा आणि वारसा नष्ट करण्याच्या हेतूचे स्पष्ट संकेत आहेत.