दोषींवर कठोर कारवाई करा! नवी मुंबई इमारत दुर्घटेनंतर फडणवीसांचे आदेश

 

 

उपमुख्यमंत्री देवेंद्र फडणवीस म्हणाले की, "नवी मुंबई भागात शहाबाजगाव येथे आज पहाटे ४ मजल्यांची एक इमारत कोसळल्याची घटना घडली असून त्यातील सुमारे ५० निवासींना सुखरूप बाहेर काढण्यात आले आहे. तसेच २ लोक जखमी झाले असून त्यांना रुग्णालयात दाखल करण्यात आले आहे. त्यांची प्रकृती स्थिर आहे."

 

 

"ढिगाऱ्याखाली २ नागरिक दबले असून त्यांना बाहेर काढण्याचे प्रयत्न केले जात आहेत. एनडीआरएफची चमू लगेच घटनास्थळी पाचारण करण्यात आली. नवी मुंबई महापालिका आयुक्तसुद्धा तातडीने घटनास्थळी दाखल झाले आहेत. बाहेर काढलेल्या नागरिकांची महापालिकेच्या निवारा केंद्रात व्यवस्था करण्यात आली आहे. या घटनेत दोषींवर कठोर कारवाई करण्याचे आदेश नवी मुंबई महापालिका आयुक्त आणि पोलिस आयुक्तांना देण्यात आले आहेत," अशी माहिती उपमुख्यमंत्री फडणवीसांनी दिली आहे.