उजव्या दिशेने फ्रान्स

युरोपियन युनियनच्या निवडणूक निकालाचे पडसाद, फ्रान्सच्या राजकारणावर पडले. निवडणूक निकाल जाहीर होताच, राष्ट्रपती मॅक्रॉन यांनी तीन वर्षांचा कार्यकाळ शिल्लक असलेल्या फ्रान्सची संसद (असेंबली नॅशनल) बरखास्त करून, मध्यावधी निवडणुकांची घोषणा केली होती. अशाप्रकारे अचानक निवडणुका घोषित करून मोठा जुगार खेळला होता, असे मत राजकीय विश्लेषकांनी व्यक्त केले होते. या निवडणुकीतील निकालामुळे मॅक्रॉन यांच्या खुर्चीला काहीही धोका नाही. फ्रान्समध्ये अर्ध-राष्ट्रपती प्रणालीने देशाचा कारभार चालतो. या प्रकारात राष्ट्रपती आणि पंतप्रधान, हे दोघेही आंतरराष्ट्रीय आणि देशांतर्गत व्यवहार हाताळतात. पंतप्रधान हे सरकारचे प्रमुख असतात, तर राष्ट्रपती हे राष्ट्राचे प्रमुख असतात.

दुसर्‍या फेरीत ज्या उमेदवारांना पहिल्या फेरीत 12.5 टक्क्यांहून कमी मतदान मिळाले असेल, त्यांची उमेदवारी बाद केली जाते. त्यामुळे दुसर्‍या फेरीत विजेता मिळायला सोपे जाते. फ्रान्समध्ये पहिल्या फेरीत विजय मिळणे, हे क्वचितच घडते. पण, सर्वेक्षणातील अंदाजानुसार, नॅशनल रॅलीतील काही उमेदवार हे पहिल्याच फेरीत विजय मिळवतील. दुसर्‍या महायुद्धानंतर ही पहिली वेळ आहे, ज्यामध्ये राष्ट्रवादी उजव्या विचारसरणीचा पक्ष फ्रान्समध्ये सत्तेच्या जवळ पोहोचत आहे. ला पेन यांच्या पक्षाला रोखण्यासाठी, फ्रान्समध्ये डाव्या आणि मॅक्रॉन यांच्या मध्यममार्गी आघाडीने, दुसर्‍या फेरीत एकत्र येऊन निवडणूक लढवण्याची चर्चा सुरू केली आहे. मॅक्रॉन यांनी उजव्या विचारसरणीच्या पक्षांना रोखण्यासाठी, सर्व राजकीय पक्षांनी एकत्र येऊन निवडणूक लढण्याचे आवाहन केले आहे. त्यांच्या आवाहनाला किती प्रतिसाद मिळतो हे अद्याप स्पष्ट झाले नसले, तरी राष्ट्रवादी विचारांच्या पक्षाला रोखण्यासाठी डावे आणि मॅक्रॉन एकत्र येऊ शकतात. यामुळे निश्चितच नॅशनल रॅलीच्या जागा कमी होऊ शकतात. पण, नॅशनल रॅलीला फ्रान्समध्ये पहिल्या क्रमाकांचा पक्ष होण्यापासून रोखणे, आता जवळपास अशक्य आहे.

नॅशनल रॅलीच्या बरखास्त झालेल्या संसदेत 88 जागा होत्या. पण, यावेळी त्यांच्या जागांचा आकडा हा 250 पेक्षा अधिक असू शकतो. त्यामुळे मॅक्रॉन यांनी मध्यावधी निवडणुका घेऊन खेळलेला राजकीय जुगार, त्यांच्यावरच उलटताना दिसत आहे. मॅक्रॉनच नाही, तर युरोपमधील डावे आणि उदारमतवादी पक्षांना पराभवाचा सामना करावा लागत आहे. उदारमताच्या नावाखाली बेकादेशीर घुसखोरांना दिलेला आश्रय, त्यातून निर्माण झालेला कायदा-सुव्यवस्थेचा प्रश्न, यांमुळे युरोपमधील जनमत हे डाव्यांच्या विरोधात जात आहे. युरोपमध्ये उजव्या विचारसरणीच्या पक्षाचा झालेला उदय हा त्याचेच द्योतक आहे. त्यामुळे आता डाव्यांना आणि उदारमतवाद्यांनासुद्धा आपले राजकीय अस्तित्त्व वाचवण्यासाठी घुसखोरांना लगाम घालावा लागणार आहे. नाहीतर, त्यांचे राजकीय अस्तित्त्व धोक्यात येईल.