घरबसल्या एसटीचे तिकीट : नव्या आरक्षण प्रणालीचा वापर वाढला

मुंबई, दि.२२: प्रतिनिधी गर्दीच्या काळात लालपरीने प्रवास करणाऱ्या प्रवाशांचा प्रवास सुखकर व्हावा यासाठी महाराष्ट्र राज्य परिवहन महामंडळाने ऑनलाईन आरक्षण सुविधा सुरु केली आहे. या अदयावत आरक्षण प्रणालीला प्रवाशांचा उस्फुर्त प्रतिसाद मिळतो आहे. ही प्रणाली सुरू झाल्यापासून पाच महिन्यात १२ लाख ९२ हजार इतक्या तिकीटाची ऑनलाईन विक्री झाल्याची माहिती एसटी महामंडळाने दिली आहे.

मिळालेल्या माहितीनुसार, १ जानेवारी २०२४ पासून ऑनलाईन आरक्षण प्रणाली अदयावत करुन नव्याने सुरु करण्यात आली. १ जानेवारी २०२४ ते २० मे २०२४ पर्यंत १२ लाख ९२ हजार इतक्या तिकीटाची विक्री या नव्या ऑनलाईन आरक्षण प्रणालीच्या माध्यमातून झाली आहे. याच काळात मागील वर्षी ९ लाख ७५ हजार तिकीटांची विक्री झाली होती. म्हणजेच मागील वर्षाच्या तुलनेत ही संख्या सुमारे ३ लाखाने वाढली आहे. सध्या या ऑनलाईन आरक्षण प्रणालीव्दारे दररोज १० हजार तिकीटे काढली जात आहेत.

प्रवाशांना घरबसल्या एसटीचे तिकीट उपलब्ध करुन देण्याच्या उददेशाने एसटीने आपल्या अधिकृत संकेतस्थळावर ऑनलाईन तिकीट आरक्षण करण्याची सोय केली आहे. तसेच मोबाईल ( भ्रमणध्वनी) वर MSRTC Bus Reservation ॲपच्या माध्यमातून देखील प्रवाशांना तिकीट काढता येते. या दोन्ही पद्धतीद्वारे तिकीट काढण्याच्या प्रणालीमध्ये १ जानेवारीपासून बदल करत अद्यावतीकरण करण्यात आले. परिणामी त्यातील अनेक दोषांचे निर्मुलन झाल्याने ही ऑनलाईन आरक्षण प्रणाली प्रवाशांना वापरण्यास अत्यंत सोपी व सुलभ झाली आहे. तसेच या दोन्ही प्रणालीव्दारे प्रवाशांना अमृत जेष्ठ नागरिक, जेष्ठ नागरिक, महिला सन्मान योजना, दिव्यांग व्यक्ती अशा विविध सवलतीचे ‍ देखिल आगाऊ आरक्षण मिळु शकते, अशी माहितीही महामंडळाने दिली आहे.