जय भीम, लाल सलाम : जेएनयु आणि सत्य

‘जवाहरलाल नेहरू युनिव्हर्सिटी स्टुडंट युनियन’ निवडणुकीमध्ये ’युनायटेड लेफ्ट’ पॅनल विजयी झाले. मग काय, रा. स्व. संघाच्या राष्ट्रनिष्ठ विचारसरणीमुळे सदैव पराजित आणि भयभीत असलेल्या कम्युनिस्ट आणि त्यांच्या समविचारी संघटनांच्या लोकांनी जेएनयुमध्ये ’जय भीम’, ’लाल सलाम’ घोषणा दिल्या. ’जय भीम’ आणि ’लाल सलाम’ यांचा संबंध काय? या निवडणुकीत जिंकलेल्यांचे सत्य काय? त्यांच्या समर्थकांचे मनसुबे कोणते? याचा मागोवा घेणारा हा लेख...

‘जय भीम’, ’लाल सलाम’ अशा घोषणा जेएनयुमध्ये नुकत्याच कानावर पडल्या. कारण, जेएनयुत ‘स्टुडंट युनियन’ निवडणुकीमध्ये ’युनायटेड लेफ्ट’ पॅनल विजयी झाले. या पॅनलमध्ये कम्युनिस्टांशी बांधिल असलेल्या ’ऑल इंडिया स्टुडंट्स असोसिएशन’, ’डेमोक्रॅटिक स्टुडंट्स फेडरेशन’, ’स्टुडंट्स फेडरेशन ऑफ इंडिया’ आणि ’ऑल इंडिया स्टुडंट्स फेडरेशन’ या संघटना एकत्रित होत्या. कम्युनिस्ट जेएनयुमध्ये जिंकले. तेव्हा सर्व या लेफ्ट पॅनलच्या विद्यार्थ्यांनी घेाषणा दिल्या की, ’जय भीम’, ’लाल सलाम.’ ’जय भीम’सोबत ’लाल सलाम’च्या घोषणा ऐकून, डॉ. बाबासाहेब आंबेडकरांचे कम्युनिस्टांसंदर्भातले विचार आठवले.

असो. जेएनयुत ‘स्टुडंट युनियन’च्या निवडणुकीमध्ये ’युनायटेड लेफ्ट पॅनल’तर्फे ऑल ’इंडिया स्टुडंट्स असोसिएशन’ माध्यमातून अध्यक्ष म्हणून धनंजय जिंकून आला. धनंजय जिंकल्यावर सर्वच क्षेत्रांतील कम्युनिस्टांनी मुलाखती-बातम्या प्रसिद्ध करण्याचा धडाका सुरू केला की, कम्युनिस्टांमुळे जेएनयुमध्ये तब्बल २८ वर्षांनी दलित विद्यार्थी अध्यक्ष झाला. धनंजय दलित आहे, याचेच भांडवल तमाम डाव्यांनी केलेे. पण, डाव्यांनी दलित म्हणून ज्या धनंजयची प्रसिद्धी केली, त्या धनंजय याने जिंकून येताच काय म्हणावे? तर शिष्यवृत्ती, महिला सुरक्षा कॅम्पस वगैरे वगैरे तोंडी लावण्यापुरते म्हटले. ते त्याला म्हणणे भागच होते म्हणा. पण, त्याने त्याच्या ’युनायटेड लेफ्ट पॅनल’चे निर्धार सांगितला. तो म्हणाला की, ”या देशात मुस्लीम असणे, हा गुन्हा आहे.

 

या ’युनायटेड लेफ्ट पॅनल’ला समर्थन करणारे कोण, याचा मागोवाही घेऊया. ‘युनायटेड लेफ्ट पॅनल’मध्ये ’ऑल इंडिया स्टुडंट्स असोसिएशन’ सामील आहे. या असोसिएशनला शुभेच्छा देणारे कोण, तर प्रा. नलिनी सुंदर. नलिनी सुंदर हिच्या नावाशी बस्तरची ती घटना जोडली गेली आहे. बस्तरच्या गावात शामनाथ बघेल याने गावातल्या लोकांना नक्षल्यांविरोधात एकत्र करत, ’तांगिया सेना’ बनवली होती. तेव्हा बस्तरमधील त्या गावामध्ये अभ्यास करण्यासाठी म्हणे नलिनी आणि इतर काही लोक गेले होते. त्यानंतर नक्षल्यांनी शामनाथ बघेलची हत्या केली. बघेलची पत्नी विमला हिने पोलिसांना सांगितले की, काही लोक त्यामध्ये एक महिलाही आली होती, तिने शामनाथला सांगितले की, ”नक्षल्यांच्या विरोधातले काम थांबव.” त्यानंतरच त्याची हत्या झाली. त्यावेळी संशयित आरोपी म्हणून नलिनी सुंदर हिचे नाव आले होते. मात्र, पुराव्या अभावी नलिनी सुटली.

विषयांतर झाले; पण सांगायला हवे होते, तर या निवडणुकीमध्ये ’लेफ्ट पॅनल’च्या विरोधात असलेल्या अभाविपचा अध्यक्षपदाचा उमेदवार होता-उमेश चंद्र अजमीरा. खर्‍या अर्थाने शोषित आणि पीडितही. प्रचंड नकारात्मक परिस्थितीतून तो तगला आणि जगलाही. तो चार वर्षांचा होता, तेव्हा त्याच्या पित्याची हत्या नक्षल्यांनी केली होती. त्यानंतर उमेशच्या आईवर धर्मांतरण करण्यासाठी, जबरदस्ती करण्यात आली. त्यामुळे तीसुद्धा देवाघरी गेली. उमेश ही निवडणूक जिंकू शकला नाही. पण, ही निवडणूक म्हणजे काही देशाच्या अंतिम कल्याणाची निवडणूक नव्हती. मात्र, या पार्श्वभूमीवर हेसुद्धा पाहणे गरजेचे आहे की, जेएनयुच्या या निवडणुकीमध्ये अखिल भारतीय विद्यार्थी परिषदेविरोधात काय घोषणा देण्यात आल्या, तर ’मिले फुले-कांशीराम, हवा में उड़ गए जय श्री राम’ , ‘ब्राह्मणवाद से आज़ादी’ आणि ‘फ्री फिलिस्तीन’अशा घोषणा देण्यात आल्या. असा व्हिडिओ प्रसारमाध्यमांमध्ये फिरत होता. काय म्हणावे? जेएनयुमध्ये अभाविपच्या विरोधात असणार्‍या त्या विद्यार्थ्यांना पॅलेस्टाईनमधील गाझा पट्टीतल्या मुस्लिमांची (ज्यामध्ये काही दहशतवादीही असतील) चिंता आहे.

मात्र, देशातल्याच हिंदू ब्राह्मण आणि समस्त हिंदूंचे श्रद्धास्थान भगवान श्रीरामांचा द्वेष आहे. जेएनयुच्या या निवडणुकीमुळे भाजपविरोधी पक्षांनी मत मांडली. बिहारचे लालू कुटुंब म्हणा, उत्तर प्रदेशचे अखिलेश म्हणा आणि देशभरातले त्यांना साथसंगत करणारे राजकीय नेते म्हणा, सगळ्यांनाच अभाविप विजयी झाली नाही, याचा आनंद झाला. लोकसभा निवडणुकीतही असेच होईल आणि मोदी, भाजप न जिंकता विरोधी पक्ष जिंकेल असेही त्यांनी म्हटले. हे सगळे विरोधी पक्ष अभाविपचा संबंध रा. स्व. संघ आणि रा. स्व. संघाचा संबंध भाजपशी जोडतात. रा. स्व. संघ विचारसरणी ही राष्ट्रनिष्ठ आहे. देशाला समाजाला जोडणारी आहे. पण, राष्ट्रापेक्षाही मार्क्सला बांधिल असलेले डावे रा. स्व. संघाला विरोधच करतात. या निवडणुकीतले एक तथ्यही महत्त्वाचे आहे. ते म्हणजे, जेएनयुच्या निवडणुकीमध्ये अभाविपला विजय मिळवता आला नाही.पण, यंदाच्या निवडणुकीत भरघोस मतदान झाले. कम्युनिस्टांच्या समोर अभाविपने चांगली लढत दिली. विजय जरी मिळाला नसला, तरी भविष्यातील विजयाकडे अभाविपच्या माध्यमातून राष्ट्रनिष्ठ युवापिढीची घोडदौड सुरू झाली, हे नक्कीच. तसेच ’जय भीम’ म्हणत ‘लाल सलाम’चे कारस्थान कसे आणि कोण रचते, त्याद्वारे डॉ. बाबासाहेब आंबेडकरांचा अपमान कोण करते, हेसुद्धा देशासमोर पुनश्च आले!