नवलनींच्या मृत्यूचे गौडबंगाल

 

 

या संशयास्पद मृत्यूनंतर रशियासहित अनेक देशांमध्ये पुतीन यांच्याविरोधात नागरिकांनी रस्त्यावर उतरत, विरोध प्रदर्शन केले. ब्रिटन, फ्रान्स, इटली, बल्गेरिया, सर्बिया, अर्जेंटिना या देशांमध्ये लोकांनी रशियन उच्चायुक्ताला घेराव घालत आंदोलन केले. दरम्यान, मृत्यूच्या एक दिवस आधी म्हणजेच, दि. १५ फेब्रुवारी रोजी अलेक्सी व्हिडिओ कॉन्फरन्सद्वारे न्यायालयीन सुनावणीला हजर होते. या व्हिडिओत नवलनी एकदम ठणठणीत असल्याचे दिसून येत असून, ते न्यायाधीशांसोबत हास्यविनोदसुद्धा करताहेत. मात्र, तुरूंग प्रशासनाने तुरुंगात चालताना, अलेक्सी बेशुद्ध होऊन खाली कोसळले आणि त्यानंतर त्यांचा मृत्यू झाल्याचे सांगितले आहे.

मॉस्को पोलिसांनी याप्रकरणी काही जणांना ताब्यात घेतले असून, त्यांची चौकशी सुरू आहे. नवलनी हा काही साधासुधा व्यक्ती नव्हता. थेट पुतीन यांना ललकारणारा माणूस म्हणून त्यांना ओळखले जायचे. रशियामध्ये लोकशाही प्रस्थापित करण्यासाठी, ते प्रयत्नशील होते. शेवटच्या श्वासापर्यंत त्यांनी रशियातील भ्रष्टाचार, लोकशाहीची पुनर्स्थापना करण्यासाठी लढा सुरू ठेवला. सामान्यांच्या अधिकारांसाठी ते नेहमी संघर्ष करत राहिले. अनेकदा त्यांच्यावर विषप्रयोग होऊनही, ते जीवंत राहिले. नवलनी यांच्या मृत्यूकडे आता राजकीय हत्या म्हणून पाहिले जात आहे. ४७ वर्षीय नवलनी यांना आर्क्टिक सर्कलच्या उत्तरेस ४० मैल अंतरावर असलेल्या, तुरुंगात ठेवण्यात आले होते. या तुरुंगात जगभरातील सर्वात धोकादायक कैद्यांना ठेवले जाते, ज्याला ’पिनल कॉलनी’ असेही म्हणतात. या तुरुंगात कैद्यांना इतक्या यातना दिल्या जातात की, ते स्वतःहून गतप्राण होतात.

नवलनी हे रशियात निवडणुकांतील पारदर्शकतेसाठी आग्रही होते. २०१३ साली मॉस्कोच्या महापौरपदासाठी ते निवडणुकीच्या रिंगणात उतरले आणि दुसर्‍या स्थानी राहिले. पुढे त्यांनी राष्ट्रपतीपदाची निवडणूक लढविण्याचादेखील प्रयत्न केला; मात्र स्वतःवर दाखल गुन्ह्यांमुळे त्यांना ही निवडणूक लढविता आली नाही. एकूणच नवलनी यांच्या मृत्यूचे गौडबंगाल समोर येईल, असे तूर्त वाटत नसले, तरीही रशियासाठी आणि त्याचबरोबर व्लादिमीर पुतीन यांच्यासाठी ही धोक्याची घंटा नक्कीच आहे.