पुनर्प्रक्रियेद्वारे मुंबईकरांना मिळणार वापरण्यायोग्य पाणी!

मुंबई : सांडपाण्यावर पुनर्प्रक्रिया करून शुद्ध केलेले पाणी पिण्याव्यतिरिक्तच्या कामासाठी वापरता येऊ शकते. ही बाब लक्षात घेत मुंबई महापालिकेकडून कुलाबा, बाणगंगा, चारकोप, माहूल, चेंबूर या मलजल प्रक्रिया केंद्रांतील पुनर्प्रक्रिया केलेल्या पाण्याची विक्री करण्यात येणार आहे. त्यामुळे लवकरच मुंबईकरांना पिण्याव्यतिरिक्त इतर कामांसाठी वापरण्यायोग्य पाणी उपलब्ध होणार आहे. हे पाणी विकत घेण्याची तयारी कांदिवलीचे अर्थव कॉलेज, बुलेट ट्रेन प्रकल्प राबवणारी ॲफकॉन इंटरनॅशनल कंपनी आणि चेंबूरमधील व्हिडिओकॉन कॉलनीने दर्शवली आहे. महापालिका हे पाणी ९ रुपये प्रती हजार लिटर दराने विकणार आहे.

सध्या मुंबईसह उपगनरांतील लोकसंख्या दीड कोटींच्या घरात असून दररोजचा पाणीपुरवठा ३,८५० दशलक्ष लिटर इतकी आहे. प्रत्यक्षात तो साडेचार हजार ते पाच हजार दशलक्ष लिटर इतका पाणीपुरवठा होणे अपेक्षित आहे. पाण्याचे स्रोत वाढवण्यासाठी महापालिका समुद्राचे खारे पाणी गोडे करणे तसेच पिण्याव्यतिरिक्तच्या कामांसाठी सात सांडपाणी पुनर्प्रक्रिया केंद्र उभारण्याचे काम सुरू आहे. त्यातून अनुक्रमे २०० आणि १ हजार २३३ दशलक्ष लिटर पुनर्प्रक्रिया केलेले पाणी उपलब्ध होणे अपेक्षित आहे.शहर आणि उपनगरांत पाच ठिकाणी मलजल प्रक्रिया केंद्र आहेत. याठिकाणी दररोज २ कोटींहून अधिक लिटर पाण्यावर प्रक्रिया करण्यात येते. हे विकून पिण्याव्यतिरिक्तच्या कामांसाठी वापरता येईल, असा विश्वास महापालिकेला आहे. पालिकेने त्यासाठी निविदा मागवल्या होत्या. त्यास चार ते पाच कंपन्या, संस्थांकडून प्रतिसाद मिळाला आहे. येत्या काही दिवसात आणखी काही कंपन्या संपर्क करण्याची शक्यता आहे, अशी माहिती पालिकेकडून देण्यात आली आहे.

- पुनर्प्रक्रिया केलेले पाणी खरेदीची यांची तयारी

ॲफकॉन इंटरनॅशनल : घाटकोपर प्रकल्पातील पाणी घेणार आहे. कंपनीच्या अधिकाऱ्यांनी प्रकल्पस्थळाची पाहणी केली आहे. टँकरने पाणी न्यायचे की पाणी वाहून नेण्यासाठी जलवाहिनी टाकायची याबाबत कंपनीची प्रशासकीय प्रक्रिया सुरू आहे.

अथर्व कॉलेज, कांदिवली : दररोज १० हजार लिटर पाणी चारकोप प्रकल्पातून घेणार आहेत.

माहुल प्रकल्पामधून सध्या २ ते ३ दशलक्ष लिटर पुनर्प्रक्रिया केलेले पाणी टँकरद्वारे घेत आहे. या प्रकल्पात पाणी वाहून नेण्यासाठी जलवाहिनी टाकण्याची प्रक्रिया सुरू आहे. ते काम पूर्ण झाल्यावर दररोज ७ ते ८ दशलक्ष लिटर पुनर्प्रक्रिया केलेले पाणी घेतले जाणार आहे. चेंबूर येथील व्हिडिओकॉन प्रकल्पातून आणखी पाच लाख लिटर पाणी घेण्यासंदर्भात पालिकेची ‘एचपीसीएल’शी बोलणी चालू आहे.

कुलाबा : १ कोटी लिटर

बाणगंगा : १० लाख लिटर

चारकोप : ४५ लाख लिटर

माहुल : ४३ लाख लिटर

चेंबूर : १५ लाख लिटर