जैन समाजाचे नीती निर्धारण संमेलन उत्साहात संपन्न
नवनिर्वाचित जैन आमदारांचा सत्कार
Total Views |
मुंबई : “देशात अग्रेसर असलेल्या महाराष्ट्राच्या सर्वांगीण विकासासाठी जैन ( Jain ) समाजाने सातत्यपूर्ण योगदान दिलेले आहे. यापुढील काळातही जैन समाज आपले सर्वोच्च योगदान महाराष्ट्राच्या व देशाच्या विकासासाठी देईल,” असा निर्धार जैन समाजाच्या नीती निर्धारण संमेलनावेळी राष्ट्रीय अध्यक्ष ललित गांधी यांनी व्यक्त केला.
‘अखिल भारतीय जैन अल्पसंख्याक महासंघ’ या समस्त जैन समाजाच्या ‘राष्ट्रीय शिखर संस्थे’तर्फे ‘नीती निर्धारण संमेलन’, संस्थेची राष्ट्रीय कार्यकारिणी बैठक, महाराष्ट्रामध्ये निवडून आलेल्या जैन आमदारांचा सत्कार व महाराष्ट्र सरकारने नव्याने बनवलेल्या ‘जैन आर्थिक विकास महामंडळा’च्या कामकाजाची रुपरेषा असा संयुक्त कार्यक्रम सिडेनहम कॉलेजच्या सभागृहात संपन्न झाला. त्यावेळी अध्यक्ष भाषणात मार्गदर्शन करताना त्यांनी हा निर्धार व्यक्त केला.
यावेळी ‘जितो अपेक्स’चे राष्ट्रीय अध्यक्ष पृथ्वीराज कोठारी, रुणवाल समूहाचे प्रमुख सुभाष रुणवाल, ‘भारत जैन महामंडळा’चे अध्यक्ष सी. सी. डांगी तसेच नवनिर्वाचित आमदार चैनसुख संचेती, राजेंद्र यड्रावकर, नरेंद्र मेहता, राहुल आवाडे, अल्पसंख्याक आयोग उपाध्यक्ष चेतन देडिया, जैन महामंडळाचे उपाध्यक्ष नितेश नाहटा, राष्ट्रीय महामंत्री संदीप भंडारी यांच्यासह विविध मान्यवर उपस्थित होते.
आमदार चैनसुख संचेती यांनी त्यांच्या राजकीय वाटचालीचा आढावा घेत जैन समाजाने “यापुढील काळामध्ये राज्याच्या विकासामध्ये वेगवेगळ्या क्षेत्रात योगदान देण्यासाठी विशेष पुढाकार घ्यावा,” असे आवाहन केले. राजेंद्र पाटील यड्रावकर यांनी जैन एकतेची आवश्यकता व अन्य समाजांसाठी आदर्शवत असे काम उभारण्याची गरज प्रतिपादन केली. राहुल आवाडे यांनी “विधानसभेत काम करण्याच्या मिळालेल्या संधीचा राज्याच्या विकासासाठी उपयोग करू व युवकांना अधिकाधिक व्यापार उद्योगांमध्ये पुढे जाण्यासाठी प्रोत्साहित करू,” असे सांगितले.
आमदार नरेंद्र मेहता यांनी जैन समाजाने दिलेल्या विविध योगदानांचा गौरवपूर्ण उल्लेख करून या पुढील काळातही जाहीर समाज आपली सामाजिक बांधिलकी कायम ठेवेल, अशी ग्वाही दिली. यावेळी ‘तामिळनाडू अल्पसंख्याक आयोगा’चे सदस्य प्रवीण टाटिया, ‘कर्नाटक अल्पसंख्याक आयोगा’चे सदस्य महेंद्र सोळंकी, राष्ट्रीय संयुक्तमंत्री सौरभ भंडारी (रतलाम), ‘मध्य प्रदेश महासंघा’चे अध्यक्ष उमेश जैन, ‘हैदराबाद महासंघा’चे संयोजक मुकेश चव्हाण, ‘गुजरात महासंघा’चे प्रदेश संयोजक राजेश रंका, महासंघाच्या राष्ट्रीय महिला प्रमुख रुचिरा सुराणा, राष्ट्रीय सहमंत्री विकास अच्छा, ’फॉम’चे जितेंद्र शाह व महाराष्ट्रच्या विविध जिल्ह्यातून पदाधिकारी व कार्यकर्ते मोठ्या संख्येने उपस्थित होते, तर सूत्रसंचालन राष्ट्रीय महामंत्री संदीप भंडारी यांनी केले.
