अमेरिकेतील सत्तांतरानंतरच्या राजकारणाचे कवित्व

ट्रम्प हे स्वभावतः व्यापारी आहेत. त्यांच्या परराष्ट्र धोरणात मैत्रीपूर्ण संबंधांपेक्षा दबावतंत्राचा वापर करुन विरोधकाला झुकवण्यावर भर असणार आहे. चीनवर दबाव टाकताना जर चीनकडून चांगली आश्वासने मिळाल्यास त्यासाठी भारताच्या हिताचा बळी द्यायला ते मागेपुढे पाहणार नाहीत. ट्रम्प यांचा विजय आणि त्याहूनही महत्त्वाचे म्हणजे अमेरिकेतील स्थैर्य भारतासाठी आश्वासक असले, तरी भारताला स्वतःच्या राष्ट्रहिताला केंद्रस्थानी ठेवायचे आहे, हे पंतप्रधान नरेंद्र मोदी आणि परराष्ट्र व्यवहार मंत्री डॉ. सुब्रमण्यम जयशंकर यांना चांगलेच माहिती आहे. अमेरिकेच्या बदललेल्या प्राथमिकता ओळखून जिकडे शक्य आहे, तिथे नवीन भागीदार जोडणे आणि नाही तिथे स्वतःच गोष्टी पुढे रेटणे आवश्यक आहे. अमेरिकेच्या डोक्यावरील कर्जाचा बोजा, अमेरिकेतील व्यवस्थेचा उडालेला बोजवारा आणि तेथील अंतर्विरोध पाहता, लवकरच वारे उलट्या दिशेने वाहू लागतील. अमेरिकेतील निवडणुकांमध्ये सरकार बदलले असले, तरी तेथील राजकारणात आणि अर्थकारणात भारतीयांचे महत्त्व मोठ्या प्रमाणात वाढले आहे. म्हणूनच अमेरिकेशी कठोरपणे वाटाघाटी करुन भारताच्या हिताची सुनिश्चिती करण्याची ही उत्तम संधी आहे.