महाबळेश्वरमधील शिन-शिन घळीत दुर्मीळ वन्यजीवांचा अधिवास; संशोधनामधून 'ही' माहिती आली समोर...

या संशोधन कार्यामध्ये मालूसरवाडी, मालूसर आणि चिखली गावांतील स्थानिक ग्रामस्थांनी मोठ्या उत्साहाने सहभाग नोंदवून प्रकल्पाला पाठिंबा दिला. अनियंत्रित पर्यटन आणि प्लास्टिकमुळे सध्या या गुहेतील परिसंस्थेला धोका निर्माण झाला आहे. त्यामुळे 'SAI' च्या संशोधकांनी महाबळेश्वर वन विभाग आणि स्थानिक गावकऱ्यांच्या मदतीने मंगळवार दि. २२ आॅक्टोबर रोजी गुहेच्या परिसरात स्वच्छता मोहिम राबवली. यावेळी राज्याचे माजी प्रधान मुख्य वनसंरक्षक (वन्यजीव) सुनील लिमये, महाबळेश्वरचे वनक्षेत्र अधिकारी गणेश महांगडे, साताऱ्याचे मानद वन्यजीव रक्षक सुनील भोईटे उपस्थित होते. त्यांच्यासोबत 'SAI' च्या संचालिका हर्षदा पेठे, मुख्य कार्यकारी अधिकारी धनुषा कावलकर, प्रोजेक्ट फेलो पूजा पाटील आणि सॅकाॅन चे प्रधान वरिष्ठ शास्त्रज्ञ मंची शिरीष एस. उपस्थित होते. यावेळी गुहेच्या परिसराची स्वच्छता करण्यात आली. तसेच प्लास्टिक आणि जैवविघटनशील कचऱ्याच्या नियोजनासाठी त्याठिकाणी कचरा पेटी आणि निर्माल्य कुंडही बसविण्यात आले. गुहेच्या परिसरात प्रदूषण नियंत्रणासाठी आणि लोकांमध्ये जागरूकता निर्माण करण्यासाठी माहिती फलक ही बसविण्यात आला.