नकाशा अन् नतद्रष्टपणा

‘इंडिया’ आघाडीने खेळ मांडला आहे तो केवळ सत्तेसाठी. सनातन धर्माला लक्ष्य केल्यानंतरही काँग्रेसकडून सनातन आणि हिंदू धर्माच्या प्रथा, परंपरांचा अपमान सुरूच आहे. कर्नाटकचे मुख्यमंत्री सिद्धरामय्या यांचा एक व्हिडिओ सध्या व्हायरल होत आहे, ज्यामध्ये ते कपाळाला टिळा लावण्यास नकार देताना दिसतात. व्होटबँक आणि तुष्टीकरणाच्या राजकारणाचा खेळ करताना काँग्रेसला सनातन धर्माचा तिरस्कार करायचा आहे. हा व्हायरल व्हिडिओ हैदराबादमधील काँग्रेस कार्यकारिणीच्या बैठकीचा आहे. यात पारंपरिक साडी नेसलेली एक महिला काँग्रेस नेत्यांचे औक्षण करून टिळा लावून स्वागत करीत असल्याचे दिसते. पण, जेव्हा सिद्धरामय्या येतात आणि ती महिला त्यांना टिळा लावण्यासाठी पुढे सरकते, तेव्हा सिद्धारामय्यांनी त्या महिलेला हाताने इशारा करीत थांबण्यास सांगितले. यानंतर महिलेने औक्षण करण्याचा प्रयत्न केला, तरीही त्यांची नकारघंटा कायम होती. काँग्रेसचेच नेते आचार्य प्रमोद कृष्णम् यांनीही त्यांचा हिंदू पेहराव आणि टिळा लावणे पक्षातील मोठ्या नेत्यांना रुचत नसल्याचे विधान गेल्याच महिन्यात केले होते. याआधीही ‘इंडिया’ आघाडीच्या अनेक नेत्यांनी टिळा लावण्यास आणि औक्षणाला नकार देत सनातन धर्माचा अनादर करण्याचा प्रयत्न केला आहे. मुंबईत झालेल्या ‘इंडिया’ आघाडीच्या बैठकीतही ममता बॅनर्जी यांनी औक्षण आणि टिळा लावण्यास मनाई केली होती. उदयनिधी स्टॅलिनपासून ते ए. राजापर्यंत, जी परमेश्वरपासून प्रियांक खर्गेपर्यंत, आरजेडीपासून सपापर्यंत, ममता बॅनर्जींपासून ते राहुल गांधी अशी यादी बरीच मोठी आहे. हिंदू परंपरांना ठेव पोहोचवा आणि मतांचे ध्रुवीकरण करा, असा एककलमी कार्यक्रम ‘इंडिया’ आघाडीने हाती घेतलाय. ‘इंडिया’ आघाडीत सामील झालेल्या उबाठा गटाच्या उद्धव ठाकरेंनीही सगळ्या विचारधारेला तिलांजली देऊन काँग्रेसची वाट पकडली. तुष्टीकरणाच्या राजकारणामुळे कोणीही हैदराबाद मुक्तिसंग्राम दिन साजरा केला नाही, अशी टीका नुकतीच केंद्रीय गृहमंत्री अमित शाह यांनी ‘इंडिया’ आघाडीवर केली. देशासाठी एकत्र येणाच्या गमजा मारणार्‍या आघाडीच्या कुण्या नेत्याने मुक्तिसंग्राम दिन साजरा केला नाही. एकीकडे हिंदू प्रथा-परंपरांचा अपमान करायचा आणि दुसरीकडेे ‘भारत जोडो’चा सारीपाट मांडायचा, अशा दुटप्पी भूमिकेने काँग्रेसचा खरा चेहरा समोर आला.