धारावीत कुपोषणमुक्तीची मुहूर्तमेढ!

मुंबई : आशिया खंडातील सर्वात मोठी झोपडपट्टी अशी ओळख असलेला धारावी परिसर कात टाकत असून, सोमवार, दि. २७ मार्च रोजी आयोजित कार्यक्रमातून धारावीत कुपोषणमुक्तीची मुहूर्तमेढ रोवण्यात आली.‘कुपोषणावर करू मात, ताजे सकस अन्न खाऊ आहारात’, ‘स्वस्थ माता स्वस्थ बालक’ अशा घोषणेने धारावीचा परिसर दुमदुमून गेला. महिला व बालविकास विभाग, महाराष्ट्र शासन आणि दै. ‘मुंबई तरुण भारत’च्या संयुक्त विद्यमाने ’पोषण पंधरवडा २०२३’ चा शुभारंभ येथील श्री गणेश विद्यामंदिरात करण्यात आला.


या वेळी दै. ’मुंबई तरूण भारत’चे संपादक किरण शेलार, समाजसेवक राजेश खंदारे, मणी बालन, महिला बाल विकास अंगणवाडी पर्यवेक्षक शर्मिला चौगुले, इंदू शिंदे, दै. ‘मुंबई तरुण भारत’च्या व्यवस्थापक गौरी परब, चीफ बिझनेस ऑफिसर उमेश रॉय-चौधरी, वितरण व्यवस्थापक जितेंद्र सोनावणे, उपसंपादिका योगिता साळवी, ज्योती साठे यांच्यासह धारावी परीसरातील ६०० महिला कार्यक्रमाला उपस्थित होत्या. यात गरोदर महिला आणि स्तनदा मातांची उपस्थिती लक्षणीय होती.

या कार्यक्रमाचे औचित्य साधून डॉ. दीपाली देशमुख यांनी विविध वयोगटातील महिलांच्या आरोग्य समस्या, कुपोषण आणि उपाय, गरोदर स्त्रिया व स्तनदा मातांनी गरोदरपणात घ्यावयाची काळजी, व्यवस्थापकीय प्रसूतीचे महत्त्व याविषयी मार्गदर्शन केले. वयात येणे, पुढे विवाह, माता होणे आणि त्यानंतर एका वयानंतर पाळी बंद होणे, या सगळ्या स्तरांवर महिलांचे मानसिक आणि शारीरिक आरोग्यातील बदल, समस्या आणि त्यावर उपाय याबाबत डॉ. दीपाली यांनी मार्गदर्शन केले.

महिलांनी ‘अ‍ॅनेमिया’ किंवा इतर कोणत्याही आजारावर महागडी औषधे घेण्याआधी ते आजार होऊ नये, यासाठी सकस आहार घ्यावा. सकस आहारामध्ये स्वयंपाक घरातले दैनंदिन वापराचे पदार्थही आरोग्यसमृद्धीसाठी उपयोगी आहेत, हे त्यांनी सांगितले. सकस पोषक आहाराद्वारे महिलांना होणार्‍या विविध आजारांना कसे थोपवू शकतो, हे डॉ. दीपाली यांनी विस्ताराने मांडले. या वेळी त्यांनी उपस्थितांच्या प्रश्नाला समर्पक उत्तरे दिली.