...तर राष्ट्रवादीमधील भूकंप तुर्कीच्या भूकंपापेक्षाही विनाशकारी : प्रसाद लाड

 

 

 

पदवीधर निवडणुकीत सत्यजित तांबेंनी मांडलेली वेगळी चूल, त्यानंतर काँग्रेसच्या विधिमंडळ गटनेते पदाचा बाळासाहेब थोरात यांनी दिलेला राजीनामा, राष्ट्रवादी काँग्रेसमधील वाढती खदखद यांसारख्या राजकीय घडामोडींमुळे महाविकास आघाडीत सध्या प्रचंड उलथापालथी दिसून येतात. तसेच आदित्य ठाकरेंच्या वरळी मतदारसंघातील कोळी बांधवांची नाराजी, भाजप-शिंदे गटाचे शक्तिप्रदर्शन यांसारख्या राज्यातील राजकीय परिस्थितीवर भाजपचे प्रदेश उपाध्यक्ष आ. प्रसाद लाड यांच्याशी दै. ‘मुंबई तरुण भारत’ने केलेली ही खास बातचित... 

 

 

 

 

 

 

 

 

 

 

महाविकास आघाडीतील अंतर्गत वादावादी आणि संघर्ष पहिल्या दिवसापासून सुरू झालेला असून तो भविष्यातही असाच कायम राहील, यात शंकाच नाही. पिंपरी-चिंचवडमध्ये ठाकरे गटाच्या उमेदवाराने अर्ज दाखल केला, तर कसब्यातही ठाकरेंच्या निकटवर्तीयांपैकी संभाजी ब्रिगेडच्या उमेदवाराने अर्ज दाखल केल्याची स्थिती निर्माण झाली होती. परंतु, कितीही आणि कुणीही उमेदवारी दाखल केली तरी लढत दुरंगी होवो अथवा तिरंगी, मात्र या दोन्ही ठिकाणी अश्विनी जगताप आणि हेमंत रासने हे भाजपचे दोन्ही उमेदवार निवडून येतील, हा मला विश्वास आहे. पुण्यासह महाराष्ट्राचा विकास कशाप्रकारे होत आहे, याचे आकलन महाराष्ट्राची जनता करत असून व्यापक जनसमर्थन भाजपला मिळेल आणि दोन्ही ठिकाणी भाजप विजयी होईल, यात तीळमात्र शंका नाही.

 

 

 

मुळातच ज्यांनी कधी घराबाहेर पडून जनतेसाठी राज्यभरात आणि देशभरात दौरे केले नाही, त्यांना या दौर्‍यांचे महत्त्वच समजणार नाही. काँग्रेसचे पंतप्रधान असोत किंवा महाविकास आघाडीचे तत्कालीन मुख्यमंत्री उद्धव ठाकरे, या मंडळींनी मुंबईसाठी कधीही दौरे केले नाहीत. किंबहुना, त्यासाठी विशेष मेहनत घेतली नाही. त्यामुळे ज्यांना शासकीय नियम, प्रोटोकॉल आणि दौर्‍यांची काहीही माहिती नाही, त्यांनी पंतप्रधानांच्या शासकीय दौर्‍याविषयी न बोललेलेच बरे! पंतप्रधान बोहरी समाजाच्या कार्यक्रमासाठी मुंबईत आले, ‘वंदे भारत’च्या दोन रेल्वे गाड्यांना हिरवा झेंडा त्यांनी दाखवला आणि इतर विकासकामांचे उद्घाटन आणि लोकार्पण त्यांनी आपल्या शुभहस्ते केले आहे. ‘वंदे भारत’च्या माध्यमातून मुंबईकरांना अवघ्या साडेचार तासांत शिर्डीला आणि साडेसहा तासांत सोलापूरला जाता येणार आहे. स्वदेशात निर्मिती झालेल्या उच्चप्रतीच्या ’वंदे भारत’ ट्रेनची सुविधा जर मुंबईकरांना ते देत असतील, तर त्यांचे आभार मानलेच पाहिजेत. पंतप्रधानांच्या मनात मुंबईकरांविषयी असलेली आपुलकी आणि संवेदनशीलता यामुळे दिसून आली आहे, त्यांना मनापासून धन्यवाद!

 

 

 

मुंबई कुणाची, हा प्रश्न विचारताच आपोआपच मुंबई ही कोळ्यांची असं चित्र आपल्या डोळ्यांसमोर उभं राहतं. मुंबईचे भूमिपूत्र असलेल्या कोळी समाजाचा मुंबईवर पहिला अधिकार आहे. गेल्या अनेक वर्षांपासून कोळीवाड्यांचे सीमांकन करण्यात यावे, अशी आग्रही भूमिका कोळी समाजाकडून लावून धरण्यात आली होती. मात्र, वरळीचे स्थानिक आमदार आणि तत्कालीन पर्यटनमंत्री आणि तत्कालीन मुख्यमंत्र्यांचे पुत्र असलेल्या आदित्य ठाकरेंसह उद्धव ठाकरेंना हा प्रश्नदेखील मार्गी लावता आला नाही. परंतु, उपमुख्यमंत्री देवेंद्र फडणवीस यांनी यावर लक्ष केंद्रित करून स्वतः हा प्रश्न सोडवण्यात मोठी भूमिका बजावली आणि कोळीवाड्यांच्या सीमांकनाचा रखडलेला प्रश्न मार्गी लावला. जर कोळी समाजाचे प्रलंबित प्रश्न सोडवून फडणवीस-शिंदेंनी त्यांना न्याय दिला असेल आणि त्यासाठी कोळी समाजाने त्यांचे अभिनंदन करताना त्यांचा जाहीर सत्कार केला असेल, तर त्यात आक्षेप घेण्यासारखे काहीही नाही. बाळासाहेबांची शिवसेना आणि भाजप मुंबईच्या भूमिपुत्रांच्या मागे खंबीरपणे उभी होती आणि भविष्यातही राहील, हे निश्चित.

 

 

 

मुळातच आदित्य ठाकरे हे कुठूनही निवडणूक लढविणार असले तरी त्यांना पराभवाची चव चाखावीच लागणार आहे. आदित्य ठाकरे स्वतः मुख्यमंत्र्यांना वरळीतून लढण्याचे आव्हान देत आहेत. परंतु, त्याची काहीही आवश्यकता नाही. मुख्यमंत्रीच काय, पण माझ्यासारखा सर्वसामान्य कार्यकर्ता जरी ठाकरेंच्या विरोधात निवडणुकीच्या मैदानात उतरला तरी ठाकरे वरळी सोडून पळून जातील, अशी परिस्थिती आज आहे. त्यामुळे आदित्य ठाकरेंना फारसे गांभीर्याने घेण्याची आणि त्यांच्याकडे फारसे लक्ष देण्याची काहीही गरज नाही.