कोकणातील 'या' बंदराचे सागरी क्षेत्र आहे हम्पबॅक व्हेलचे 'हाॅटस्पाॅट'; 'WII'चे सर्वेक्षण

'अरेबियन सी हम्पबॅक व्हेल' हा अरबी समुद्रात आढळणारा दुर्मीळ सागरी सस्तन प्राणी आहे. भारत, पाकिस्तान, ओमान, इरान, इराक, कतार, अरब राष्ट्र, येमन आणि कुवेत या देशांच्या सागरी परिक्षेत्रामध्ये या सागरी सस्तन प्राण्याचा अधिवास आढळतो. 'आययूसीएन'च्या लाल यादीत या प्राण्याला 'संकटग्रस्त' प्रजातींच्या यादीत स्थान देण्यात आले आहे. याच हॅम्पबॅक व्हेलचा भारतीय समुद्रातील अधिवास अभ्यासण्यासाठी देशाच्या किनारपट्टी भागात 'डब्लूआयआय'कडून संशोधन प्रकल्प राबविण्यात येत आहे. 'डब्लूआयआय'चे संचालक विरेंद्र तिवारी यांच्या मार्गदर्शनाअंतर्गत संस्थेचे शास्त्रज्ञ डाॅ.जे.ए.जाॅन्सन यांच्या मार्गदर्शनाअंतर्गत संशोधकाचे पथक संशोधनाचे काम करत आहेत. या संशोधनामध्ये 'अरेबियन सी हम्पबॅक व्हेल'च्या पूर्वीच्या नोंदी, किनाऱ्यावर वाहून आल्याच्या नोंदी, मासेमारीच्या नोंदी यांचा आढावा घेण्यात आला आहे. त्यापुढे जाऊन मच्छिमारांच्या मुलाखती घेऊन अंतीम सर्वेक्षण करण्यात आले आहे. हम्पबॅक व्हेलचे निरीक्षण, त्यांची वावरण्याची ठिकाणे आणि सागरी सस्तन प्राण्यांना असणारे धोके हे या सर्वेक्षणाचे प्राथमिक लक्ष होते. या सर्वेक्षणाअंती हम्पबॅक व्हेल वारंवार दिसल्याच्या ठिकाणी त्यांचे हाॅटस्पाॅट निश्चित करण्यात आले.